పాలమూరు, వెలుగు: నియోజకవర్గంలోని అన్ని వర్గాల ప్రజలకు అండగా ఉంటానని మహబూబ్నగర్ కాంగ్రెస్ అభ్యర్థి యెన్నం శ్రీనివాస్ రెడ్డి (వైఎస్ఆర్) హామీ ఇచ్చారు. జిల్లా కేంద్రంలోని పార్టీ కార్యాలయంలో ఆదివారం టీఎమ్మార్పీఎస్ నాయకులు కాంగ్రెస్ పార్టీకి మద్దతు ప్రకటిస్తున్నట్లు స్పష్టం చేశారు. ఈ సందర్భంగా క్రిస్టియన్ మైనార్టీ జిల్లా అధ్యక్షుడు బండా సునీల్ కుమార్ ఆధ్వర్యంలో జీపీ పాల్, సుజయ్ కుమార్, ప్రశాంత్, భూషణం, జైపాల్, రాజు కాంగ్రెస్లో చేరారు.
అలాగే బీఆర్ఎస్ పట్టణ మాజీ యూత్ వైస్ ప్రెసిడెంట్ రఘు, ఆ పార్టీ కార్యకర్తలు రఘు, సంతోష్, క్రాంతి ఉమ్మడి జిల్లా గౌడ సంఘం అధ్యక్షుడు ఆనంద్ గౌడ్ ఆధ్వర్యంలో పార్టీలో చేరారు. హన్వాడ మండలానికి చెందిన టీఏసీఏ జిల్లా అధ్యక్షుడు రవికుమార్, ఎండీ మైనోద్దీన్, తెలంగాణ ఉద్యమకారుడు ఎండీ జహంగీర్, ఎండీ అబ్దుల్ తదితరులు మారేనల్లి సురేందర్ రెడ్డి ఆధ్వర్యంలో కాంగ్రెస్ కండువాలు కప్పుకున్నారు. వీరిని వైఎస్ఆర్ పార్టీలోకి ఆహ్వానించారు.
అనంతరం గ్రామీణ వైద్యులతో సమావేశం అయ్యారు. ఈ సందర్భంగా యెన్నం మాట్లాడుతూ ఎస్సీలకు చెందిన అసైన్డ్ భూములను బీఆర్ఎస్ సర్కారు గుంజుకుందని, ఆ భూముల్లో రైతు వేదికలు, శ్మశానవాటికలు కట్టారన్నారు. కాంగ్రెస్ అధికారంలోకి రాగానే ఎస్సీల సమస్యను పరిష్కరిస్తామన్నారు. గ్రామీణ వైద్యులకు ప్రత్యేకంగా శిక్షణ కార్యక్రమాలు రూపొందించి, పల్లెల్లో నాణ్యమైన వైద్యం అందించేందుకు ఏర్పాట్లు చేస్తామన్నారు. పార్టీ ప్రధాన కార్యదర్శి వినోద్ కుమార్, లీడర్లు సీజే బెనహర్ పాల్గొన్నారు.
