న్యూఢిల్లీ: తమిళనాడు గవర్నర్ ఆర్ఎన్ రవిపై సుప్రీంకోర్టు తీవ్ర ఆగ్రహం వ్యక్తం చేసింది. తామిచ్చిన తీర్పును ధిక్కరిస్తున్నారని ఫైర్ అయింది. శుక్రవారం సాయంత్రంలోపు డీఎంకే మాజీ మంత్రి పొన్ముడిని మంత్రిగా నియమించడంపై నిర్ణయం తీసుకోవాల్సిందేనని డెడ్లైన్ విధించింది. అక్రమాస్తుల కేసులో పొన్ముడికి గతంలో జైలు శిక్ష పడటంతో ఎమ్మెల్యేగా ఆయన సభ్యత్వం రద్దయింది. ఈ కేసులో శిక్షను నిలిపివేస్తూ సుప్రీంకోర్టు ఆదేశాలిచ్చింది. దీంతో పొన్ముడి ఎమ్మెల్యేగా కొనసాగుతారని తమిళనాడు స్పీకర్ ప్రకటించారు. సీఎం స్టాలిన్.. పొన్ముడి పేరును మంత్రిగా సిఫార్సు చేయగా.. గవర్నర్ నిరాకరించారు. స్టాలిన్ సర్కారు సుప్రీం కోర్టును ఆశ్రయించగా, కోర్టు ఈ మేరకు తీర్పు చెప్పింది.
