పెద్దపల్లి జిల్లా కాల్వ శ్రీరాంపూర్ మండలం జాఫర్ఖాన్పేట, వెన్నంపల్లి గ్రామాల సరిహద్దులో రామగిరిగుట్టకు ఆనుకొని ఉన్న పాంవడలొంకకు పర్యాటకుల తాకిడి పెరిగింది. కనువిందు చేస్తున్న జలపాతాలను చూడటానికి ఉమ్మడి కరీంనగర్ జిల్లా నుంచి టూరిస్టులు తరలిస్తున్నారు. వర్షాకాలంలో ఈ లొంకలో జలపాతాలు ఆకర్షణగా నిలుస్తున్నాయి. శ్రావణ మాసంలో సమీప గ్రామాల ప్రజలు ఇక్కడ లక్ష్మీదేవికి పూజలు చేస్తారు. లక్ష్మీదేవి పాండవలొంకలో పుట్టిందని ఇక్కడ ప్రజలు నమ్ముతుంటారు.
పాండవులు వనవాసం టైంలో ఇక్కడ కొంతకాలం గడిపారని, భీముడు తన గదను కింద పెట్టడంతో ఆ రూపంలో కయ్య ఏర్పడిందని స్థానికులు చెబుతున్నారు. ఆ కయ్యలోనే పర్యాటకులు స్నానాలు చేస్తుంటారు. సమీప అడవుల్లోంచి ప్రవహించి లొంకలోకి పైనుంచి కిందికి పడుతున్న నీటిలో ఔషధ గుణాలు ఉంటాయని భావిస్తారు. టూరిస్టులు ఆ నీటిని తాగడంతోపాటు ఇండ్లకు కూడా తీసుకెళ్తుంటారు.
ఇక్కడకు చేరుకోవాలంటే పెద్దపల్లి నుంచి కాల్వశ్రీరాంపూర్ వెళ్లే మార్గంలో వెన్నంపల్లి నుంచి, లేదా జాఫర్ఖాన్పేట నుంచి రెండు మార్గాలు ఉన్నాయి. లొంక వరకు చేరుకోవడానికి దాదాపు రెండు కిలోమీటర్లు మట్టి, రాళ్లతో ఉన్న దారిలో కాలినడకన గుట్టను ఎక్కి లొంకలోకి దిగాల్సి ఉంటుంది. రోడ్డు మార్గం లేకపోవడంతో టూరిస్టులు తీవ్ర ఇబ్బందులు ఎదుర్కొంటున్నారు. -పెద్దపల్లి, వెలుగు
