చందానగర్ ​సర్కిల్​లో .. మామూళ్లకు ప్లానింగ్!

• కంప్యూటర్ ఆపరేటర్ కేంద్రంగా అక్రమ దందా
• కోర్టు కేసులున్న భూముల్లోనూ నిర్మాణాలకు పర్మిషన్లు
• ఉన్నతాధికారులు మారినప్పుడు కూల్చివేతలతో హడావుడి
• నాలుగు రోజుల తర్వాత అంతా షరా ‘మామూళ్లే’

మాదాపూర్, వెలుగు: జీహెచ్ఎంసీ శేరిలింగంపల్లి జోన్ చందానగర్​సర్కిల్ పరిధిలోని టౌన్​ప్లానింగ్​ ఆఫీసర్లు విచ్చలవిడిగా అక్రమ నిర్మాణాలను ప్రోత్సహిస్తున్నారు. అడిగినంత మామూళ్లు అందుతుండడంతో రెచ్చిపోతున్నారు. జీహెచ్ఎంసీ కమిషనర్, జోనల్​కమిషనర్, సర్కిల్​డీసీ, ఏసీపీ మారినప్పుడు ఒకటి రెండు అక్రమ నిర్మాణాలను కూల్చి, ఆ తర్వాత తిరిగి అక్రమ దందాను షురూ చేస్తున్నారు.

మంగళవారం మాదాపూర్​అయ్యప్ప సొసైటీలోని కొన్ని అక్రమ నిర్మాణాలను చందానగర్​టౌన్ ప్లానింగ్​ఆఫీసర్లు కూల్చారు. అయితే అవన్నీ సింగిల్​ఫ్లోర్, పిల్లర్ల దశలో ఉన్న నిర్మాణాలే. అయ్యప్ప సొసైటీ, సర్వే ఆఫ్ ఇండియా, చంద్రనాయక్​ తండా ఏరియాల్లో ఐదారు ఫ్లోర్లతో వందల సంఖ్యలో అక్రమ నిర్మాణాలు కొనసాగుతున్నాయి. అధికారులు వాటి జోలికి వెళ్లడం లేదు. దీంతో కొందరు నిర్మాణదారులు అధికారులతో వాగ్వాదానికి దిగారు. ఎలాంటి పర్మిషన్లు లేకుండా నిర్మిస్తున్న భారీ బిల్డింగులను ఎందుకు వదిలేస్తున్నారని నిలదీశారు.

చందానగర్​సర్కిల్​టౌన్​ప్లానింగ్​ఏసీపీపై అనేక అవినీతి ఆరోపణలు ఉన్నాయి. చెరువు ఎఫ్ టీఎల్, బఫర్​జోన్లలో ఇండ్ల నిర్మాణాలకు పర్మిషన్లు ఇచ్చుకుంటూ పోతున్నాడని సమాచారం. శేరిలింగంపల్లి జోనల్​టౌన్ ప్లానింగ్ ఆఫీసర్లు ఆయన దారిలోనే నడుస్తున్నట్లు తెలుస్తోంది. చెరువులు, పార్కు స్థలాల్లో, నాలాలపై నిర్మాణాలకు అనుమతులు ఇచ్చేస్తున్నారు. బిల్డింగ్ పర్మిషన్ కు కొంత, ఫ్లోర్​కు కొంత కలిపి రూ.లక్షలు దండుకుంటున్నట్లు బహిరంగంగా చెప్పుకుంటున్నారు. ఇంత ఓపెన్​గా అక్రమ నిర్మాణాలు కొనసాగుతున్నా చర్యలు తీసుకోకపోవడం చర్చనీయాంశమైంది. 

వివాదాస్పద భూముల్లోనూ..

చందానగర్​సర్కిల్​పరిధిలోని సర్వే నంబర్​11/8 నుంచి 11/32 వరకు మాదాపూర్ అయ్యప్ప సొసైటీ, సర్వే ఆఫ్ ఇండియా, చంద్రానాయక్​తండాలలో గురుకుల్ ట్రస్ట్ భూములు ఉన్నాయి. హైకోర్టు, సుప్రీం కోర్టుల్లో వీటికి సంబంధించిన కేసులు నడుస్తున్నాయి. ఇక్కడ ఇండ్ల నిర్మాణాలకు అనుమతులు ఇవ్వడానికి వీలు లేదు. అయితే కొందరు చందానగర్​సర్కిల్, శేరిలింగంపల్లి జోనల్ టౌన్​ ప్లానింగ్​ అధికారులను మ్యానేజ్​ చేసి భవన నిర్మాణాలు చేపడుతున్నారు.చందానగర్​ టౌన్​ ప్లానింగ్​ అధికారులు, శేరిలింగపల్లి జోనల్ టౌన్​ప్లానింగ్​ఆఫీసర్లకు భారీ మొత్తంలో డబ్బు ముట్టజెప్పి, నిర్మాణాలు చేపడుతున్నారు. ఆఫీసర్లు అనుకూలంగా ఉండడంతో నిర్మాణదారులు రెచ్చిపోతున్నారు. ఒకటి కాదు రెండు కాదు ఏకంగా ఐదారు అంతస్థుల్లో బిల్డింగ్స్​నిర్మిస్తున్నారు. వాటిని ప్రైవేట్​కాలేజీలకు, హాస్టళ్లకు రెంటుకు ఇస్తున్నారు.

అక్రమ దందాలో కీ రోల్ ఆయనదే.. 

మాదాపూర్ అయ్యప్ప సొసైటీ, సర్వే ఆఫ్​ ఇండియా, చంద్రానాయక్​తండా, అగర్వాల్​లేఅవుట్లలోని అక్రమ నిర్మాణాల వెనుక చందానగర్ సర్కిల్​టౌన్​ ప్లానింగ్ విభాగంలో పనిచేస్తున్న కంప్యూటర్​ఆపరేటర్(ఔట్​సోర్సింగ్)​ కీలక పాత్ర పోషిస్తున్నాడు. ఇతను 1999, మే నెలలో శేరిలింగపల్లి మున్సిపాలిటీలోని టౌన్​ప్లానింగ్​విభాగంలో కంప్యూటర్​ఆపరేటర్​గా చేరాడు.

జీహెచ్ఎంసీ శేరిలింగపల్లి, చందానగర్​సర్కిళ్లు ఏర్పడిన తర్వాత చందానగర్​సర్కిల్​కు వచ్చాడు. ఈ సర్కిల్​వచ్చే డిప్యూటీ కమిషనర్, టౌన్​ప్లానింగ్ ఏసీపీలకు అనుకూలంగా ఉంటూ అక్రమ నిర్మాణాలకు సపోర్ట్​ చేసేలా మేనేజ్​చేస్తున్నాడు. ఒక్కో బిల్డింగ్​కు ఒక్కో రేటు ఫిక్స్​చేసి వసూలు చేస్తున్నాడు. అలాగే ఒక్కో ఫ్లోర్ కు రూ.3లక్షల నుంచి రూ.4 లక్షల వరకు దండుకుంటున్నాడు. వాటిని టీపీఎస్, ఏసీపీ, డీసీ స్థాయి నుంచి జోనల్​సిటీ ప్లానర్ వరకు అందజేస్తున్నాడు. అతని ద్వారా ఉన్నతాధికారుల అండదండలు ఉండడంతో బిల్డర్లకు అడ్డూ అదుపు లేకుండా పోయింది.

అతనికి ట్రాన్స్​ఫర్​ ఉండదు...

చందానగర్​సర్కిల్​కంప్యూటర్​ఆపరేటర్​కు పొలిటికల్ లీడర్ల సపోర్టు బాగానే ఉన్నట్లు తెలుస్తోంది. ఆయన ఏనాడూ కంప్యూటర్​ముందు కూర్చున్న దాఖలాలు లేవని బల్దియా సిబ్బందే చెబుతున్నారు. సర్కిల్​పరిధిలో ఎక్కడెక్కడ నిర్మాణాలు జరుగుతున్నాయో గుర్తించి, అక్రమ వసూళ్లకు పాల్పడడమే ఆయన పని అంటున్నారు. ఇటీవల ఓ జోనల్ కమిషనర్​ఈ కంప్యూటర్​ఆపరేటర్​ను వేరే సర్కిల్​కు ట్రాన్స్ ఫర్​చేసినప్పటికీ, తన పలుకుబడి ఉపయోగించుకొని గంటల వ్యవధిలో తిరిగి చందానగర్​సర్కిల్ కు వచ్చేశాడు. ఇతని తండ్రి రిటైర్డ్​ఏఎస్ఐ కావడంతో అటు పోలీసుల, ఇటు మున్సిపల్ ఆఫీసర్ల సపోర్టు పుష్కలంగా ఉందని తెలుస్తోంది.

స్పెషల్ ​టీమ్స్ ఏర్పాటు చేస్తున్నాం

ప్రస్తుతం పిల్లర్లు, స్లాబ్ దశలోని అక్రమ నిర్మాణాలను కూల్చి వేస్తున్నాం. త్వరలో భారీ అక్రమ భవనాలను ఓకేసారి కూలుస్తాం. అందుకోసం ఉన్నతాధికారుల పర్యవేక్షణలో స్పెషల్​టీమ్స్​రెడీ చేస్తున్నాం.

ఉపేందర్​రెడ్డి, జోనల్ కమిషనర్, శేరిలింగంపల్లి