సికింద్రాబాద్, వెలుగు: బాల కార్మికులుగా మార్చేందుకు సిటీకి తీసుకువస్తున్న 26 మంది చిన్నారులను రైల్వే పోలీసులు కాపాడారు. వారిని తరలిస్తున్న 8 మందిని అరెస్ట్ చేశారు. ఓ ముఠా వెస్ట్బెంగాల్, జార్ఖండ్ రాష్ట్రాల్లోని నిరుపేద కుటుంబాలను గుర్తించి, వారికి డబ్బు ఆశ చూపి, వారి పిల్లలను బాలకార్మికులుగా మార్చేందుకు ప్లాన్ వేసింది.
ఆయా రాష్ట్రాల నుంచి ఈస్ట్ కోస్ట్ ఎక్స్ప్రెస్లో పిల్లలను నగరానికి తరలిస్తుండగా.. సమాచారం అందుకున్న రైల్వే పోలీసులు గురువారం సికింద్రాబాద్ రైల్వే స్టేషన్కు వచ్చిన ఆ రైలులో సికింద్రాబాద్ విమెన్ సేఫ్టీ వింగ్అధికారులు, చైల్డ్ ప్రొటెక్షన్, చైల్డ్ వెల్ఫేర్ కమిటీ అధికారులతో కలిసి తనిఖీలు చేపట్టారు. 26 మంది పిల్లలను కాపాడి, వారిని తరలిస్తున్న 8 మంది ముఠా సభ్యులను అరెస్టు చేశారు. ఆ పిల్లలను రెస్క్యూ హోంకు తరలించారు.
