- జెండా కోసం నిలబెడుతుండగా11 కేవీ లైన్కు తాకిన పోల్
- మృతుల కుటుంబాలకు రూ.5 లక్షల ఎక్స్గ్రేషియా
ములుగు, వెలుగు : ములుగులో కొందరు యువకులు రిపబ్లిక్ డే ఉత్సవాల కోసం ఏర్పాట్లు చేసుకుంటుండగా విషాదం చోటు చేసుకుంది. జాతీయ జెండా ఆవిష్కరించేందుకు ఎస్సీ కాలనీకి చెందిన యువకులు జెండా పైపును అమరుస్తున్న క్రమంలో 11కేవీ విద్యుత్ తీగలు తగిలి ముగ్గురికి షాక్ కొట్టింది. ఈ ప్రమాదంలో ఇద్దరు చనిపోగా, మరొకరు తీవ్రంగా గాయపడ్డారు. ములుగులోని శివాలయం ఎదురుగా ఉన్న ఎస్సీ కాలనీకి చెందిన బోడ ఏలేంద్ర-, కొమురయ్య దంపతుల కొడుకు బోడ అంజిత్ కుమార్(28) సెంట్రింగ్, కూలీ పనులు చేస్తుంటాడు. ఈయనకు భార్య లావణ్య, ఇద్దరు కొడుకులు, ఒక కూతురు ఉన్నారు. అలాగే ల్యాడ లక్ష్మీ-శంకర్ కొడుకు ల్యాడ విజయ్(25) కూలీ. శుక్రవారం రిపబ్లిక్ డే సందర్భంగా స్థానిక యువకులు జాతీయ జెండా ఆవిష్కరణ కార్యక్రమం ఏర్పాటు చేశారు. ఉదయం 9గంటల ప్రాంతంలో అంజిత్కుమార్, ల్యాడ విజయ్, బోడ కల్యాణ్ తోపాటు మరికొందరు జెండా కోసం ఇనుప పైపును నిలబెట్టే పనుల్లో ఉన్నారు. జెండా గద్దెపై నుంచే 11కేవీ విద్యుత్ లైన్ వెళ్తోంది. దీన్ని గమనించని యువకులు పైపును పైకెత్తి జెండా గద్దెలో వేసేందుకు ప్రయత్నించగా తీగలకు తగిలింది. దీంతో షాక్కొట్టి అంజిత్, విజయ్, కల్యాణ్ తీవ్రంగా గాయపడ్డారు. ముగ్గురిని జిల్లా దవాఖానకు తరలించగా చికిత్స పొందుతూ అంజిత్, విజయ్ చనిపోయారు. పోలీసులు కేసు నమోదు చేసుకొని దర్యాప్తు చేస్తున్నారు.
మృతుల కుటుంబసభ్యులకు మంత్రి పరామర్శ
యువకులు చనిపోయిన విషయం తెలుసుకున్న పంచాయతీరాజ్, గ్రామీణాభివృద్ధి, స్త్రీ శిశు సంక్షేమ శాఖ మంత్రి సీతక్క మృతుల కుటుంబసభ్యులను పరామర్శించారు. తక్షణ సాయంగా రూ.10వేలను ఇచ్చిన సీతక్క...ఒక్కోకుటుంబానికి రూ.5లక్షల ఎక్స్గ్రేషియా ప్రకటించారు. కల్యాణ్కు మెరుగైన చికిత్స అందించాలని డాక్టర్లను ఆదేశించారు.
ఉత్తమ ఉద్యోగిగా ప్రశంసపత్రం అందుకున్న 2 గంటల్లోనే హఠాన్మరణం
ఆదిలాబాద్టౌన్ : ఆదిలాబాద్ మున్సిపల్ ఆఫీసులో మేనేజర్గా పని చేస్తున్న దివాకర్ ఉత్తమ ఉద్యోగిగా అవార్డు తీసుకున్న రెండు గంటల్లోనే హఠాన్మరణం చెందారు. శుక్రవారం రిపబ్లిక్ డే వేడుకల్లో ఆయన కలెక్టర్ రాహుల్రాజ్ నుంచి ఉత్తమ ఉద్యోగిగా ప్రశంసపత్రం తీసుకున్న తర్వాత ఇంటికి వెళ్లాడు. కొద్దిసేపటికే అస్వస్థతకు గురి కావడంతో కుటుంబీకులు ప్రైవేట్దవాఖానకు తరలించారు. అప్పటికే దివాకర్ గుండెపోటుతో చనిపోయాడని డాక్టర్లు నిర్ధారించారు.
