ప్రమాదవశాత్తు స్కూల్ విద్యార్థి బస్సు కింద పడి మృతి చెందిన విషాద సంఘటన జనగామ జిల్లా అడవికేశవాపూర్ లో చోటుచేసుకుంది..బస్సు దిగుతుండగా బ్యాగ్ తట్టుకొని వెనక టైర్ల కిందపడి మృతిచెందిన విషాద ఘటన అందరిని కలచి వేస్తోంది. డ్రైవర్ నిర్లక్ష్యం వల్లే బాలుడు మృతి చెందాడని తల్లిదండ్రులు, గ్రామస్తులు ఆందోళనకు దిగారు.వివరాల్లోకి వెళితే..
అడవికేశవపూర్ గ్రామానికి చెందిన బాలుడు బానోతు వరుణ్ తేజ్ (7) జనగామ జిల్లా కేంద్రంలోని గౌతమి మోడల్ స్కూల్ లో1వ తరగతి చదువుతున్నాడు.రోజులాగే ఉదయం స్కూలుకు వెళ్లి సాయంత్రం స్కూలు బస్సులో ఇంటికి తిరిగి వస్తున్న క్రమంలో బస్సు దిగుతుండగా స్కూల్ బ్యాగ్ బస్సుకు తట్టుకొని వెనక టైర్ కింద పడిపోయాడు.అది గమనించని డ్రైవరు బస్సుని ముందుకు పోనివ్వడంతో బాలుడు వెనకటైరు కింద పడి అక్కడికక్కడే మృతి చెందాడు.
ఘటనా స్థలానికి చేరుకున్న బాలుడి తల్లిదండ్రుల రోదనలు పలువురిని కంటతడి పెట్టించాయి. డ్రైవర్ నిర్లక్ష్యం వల్లే ప్రమాదం జరిగిందని.. బస్సు అ ద్దాలు ధ్వంసం చేశారు స్థానికులు, మృతుడి బంధువులు. రోడ్డుపై బైఠాయించి ధర్నా చేశారు. సంఘటన స్థలానికి చేరుకున్న పోలీసులు దర్యాప్త చేస్తున్నారు.
