ప్రస్తుతం మొబైల్ వినియోగదారులు ఎదుర్కొంటున్న ప్రధాన సమస్యల్లో స్పామ్ కాల్స్, స్పామ్ మెసేజేస్ ఒకటి. ఫోన్లు వాడుతోన్న వారిలో మెజార్టీ యూజర్స్ ఈ సమస్యను ఫేస్ చేస్తోన్నారు. గుర్తు తెలియని నెంబర్లు నుండి వచ్చే కాల్స్, మెసేజ్ల వల్ల వినియోగదారులు తీవ్ర ఇబ్బందులు ఎదుర్కొంటున్నారు. ఈ క్రమంలో స్పామ్ కాల్స్, మెసేజేస్ కట్టడికి టెలికాం రెగ్యులేటరీ అథారిటీ ఆఫ్ ఇండియా (ట్రాయ్) రంగంలోకి దిగింది. ఈ మేరకు టెలికాం కంపెనీలకు ట్రాయ్ కీలక ఆదేశాలు జారీ చేసింది.
స్పామ్ కాల్స్, మెసేజ్ల కట్టడి చర్యలు తీసుకోవాలని అన్ని సర్వీస్ ప్రొవెడర్లకు ఆదేశాలు పంపిన ట్రాయ్.. కీలక సూచనలు చేసింది. ట్రాయ్లో రిజిస్టర్ కానీ టెలిమార్కెట్ సంస్థల నుండి వచ్చే ప్రమోషనల్ కాల్స్, రికార్డ్ కాల్స్, కంప్యూటర్ ఆధారిత స్పామ్ కాల్స్ను తక్షణమే నిలిపివేయాలని టెలికాం కంపెనీలకు స్పష్టం చేసింది. టెలికాం కమర్షియల్ కమ్యూనికేషన్ కస్టమర్ ప్రిఫరెన్స్ రెగ్యులేషన్స్ 2018 చట్టం ప్రకారం టెలికాం కంపెనీలకు ట్రాయ్ తాజా ఆదేశాలు జారీ చేసింది.
ట్రాయ్ ఆదేశాలు:
ఎస్ఐపీ (సెషన్ ఇనిషియేషన్ ప్రోటోకాల్) పీఆర్ఐ (ప్రైమరీ రేట్ ఇంటర్‌ఫేస్) వంటి టెలికాం వనరులను ఉపయోగించి ట్రాయ్లో నమోదు చేయని టెలిమార్కెటర్‌ల నుండి వచ్చే వాయిస్ ప్రమోషనల్ కాల్‌లను అన్ని యాక్సెస్ సర్వీస్ ప్రొవైడర్లు తక్షణమే ఆపివేయాలని ట్రాయ్ తాజా ఆదేశాల్లో పేర్కొంది. నేరస్థులను డిస్‌కనెక్ట్ చేసి బ్లాక్‌లిస్ట్ చేయడం: రిజస్టర్ కానీ కంపెనీల నుండి వచ్చే స్పామ్ కాల్స్ పై వినియోగదారులు ఫిర్యాదు చేస్తే వెంటనే ఆరిజినేటింగ్ యాక్సెస్ ప్రొవైడర్ స్పామ్ కాల్స్, మెసేజ్లు చేసిన వారి అన్ని టెలికాం వనరులను 2 సంవత్సరాల వరకు డిస్‌కనెక్ట్ చేయాలి.
ALSO READ | హైదరాబాద్‌‌‌‌‌‌‌‌లో 32 శాతం పెరిగిన ఇండ్ల ధరలు
దీంతో పాటుగా స్పామ్ కాల్స్ చేసిన మార్కెటింగ్ కంపెనీలను అన్ని యాక్సెస్ ప్రొవైడర్లచే బ్లాక్ లిస్ట్ చేయబడతాయి. ప్రొవైడర్ల మధ్య సమాచార భాగస్వామ్యం: బ్లాక్ లిస్ట్ చేసిన కంపెనీ వివరాలను 24 గంటలలోపు డీఎల్టీ ప్లాట్‌ఫారమ్ ద్వారా అన్ని యాక్సెస్ ప్రొవైడర్‌లకు సమాచారం షేర్ చేయబడుతుంది. తద్వారా నిబంధనలు ఉల్లఘించిన బ్లాక్ లిస్ట్ లో పెట్టబడిన కంపెనీలకే ఏ యాక్సెస్ ప్రొవైడర్ ద్వారా టెలికాం వనరులు కేటాయించొద్దని ట్రాయ్ ఆదేశించింది.
