నరికేసి..వదిలేస్తున్నరు

• రోడ్డు పక్కన కుప్పలుగా పేరుకుపోతున్న చెట్ల కొమ్మలు         
• విద్యుత్​ శాఖ కాంట్రాక్టర్లదే తరలించే బాధ్యత

హైదరాబాద్‌‌, వెలుగు:వర్షాలు, ఈదురు గాలలకు కూలిన చెట్లను బల్దియా డీఆర్‌‌ఎఫ్‌‌ బలగాలు వెంటవెంటనే తొలగిస్తున్నాయి. అర్బన్‌‌ బయో డైవర్సిటీ అధికారులు, పారిశుద్ధ్య విభాగం దీనికోసం చర్యలు తీసుకుంటున్నాయి. ఈ సీజన్‌‌లో నగర వ్యాప్తంగా సుమారు 150 చెట్లు పడిపోగా మాన్‌‌సూన్‌‌ బృందాలు తొలగించాయి. అయితే సిటీలో చాలా చోట్ల చెట్ల కొమ్మలు ఎండిపోయి రోడ్డు పక్కన కుప్పలుగా కనిపిస్తున్నాయి. కరెంటు​ వైర్లకు తగులుతున్నాయన్న కారణంతో విద్యుత్​శాఖ అధికారులు కూడా సిబ్బందితో చెట్ల కొమ్మలు కొట్టేపిస్తున్నారు. వాటిని తొలగించకుండా వదిలేయడంతో రోడ్డు పక్కనే ఎండిపోయి వ్యర్థాలుగా మారుతున్నాయి. జీహెచ్‌‌ఎంసీ, విద్యుత్‌‌ శాఖల మధ్య సమన్వయం లేకనే ఇట్లా జరుగుతున్నట్టు తెలుస్తోంది. విద్యుత్‌‌శాఖ నిర్లక్ష్యం తలనొప్పిగా మారిందని బల్దియాలోని ఓ అడిషనల్‌‌ కమిషనర్‌‌ వ్యాఖ్యానించారు. కరెంటు తీగలకు అడ్డుగా ఉన్న చెట్లు, కొమ్మలను నరికేసి చేతులు దులుపుకుంటున్నారని అసంతృప్తి వ్యక్తం చేశారు. వర్షాకాలానికి నెల రోజుల ముందు నుంచే మెయిన్​రోడ్లు, అంతర్గత రహదారుల వెంట స్తంభాలు, తీగలకు ఆనుకుని ఉన్న చెట్ల కొమ్మలను విద్యుత్​శాఖ కట్‌‌ చేయించింది. వాటిని తరలించాల్సిన కాంట్రాక్టర్‌‌తో పట్టించుకోకపోవడంతోనే ఇదంతా జరుగుతున్న తెలుస్తోంది.

తొలగించకుంటే ఫైన్​

వర్షానికి పడిపోయిన చెట్ల తొలగింపు బాధ్యతను జోనల్‌‌ లెవల్‌‌లో అర్బన్‌‌ బయో డైవర్సిటీ, పారిశుద్ధ్య, డీఆర్‌‌ఎఫ్‌‌ బలగాలు సంయుక్తంగా నిర్వహిస్తాయి. చెట్టు పడిపోయిందని జీహెచ్‌‌ఎంసీ కాల్‌‌ సెంటర్‌‌కు సమాచారం రాగానే స్థానికంగా ఉన్న మాన్‌‌సూన్‌‌ యాక్షన్‌‌ టీమ్‌‌లు రంగంలోకి దిగుతాయి. విద్యుత్​ శాఖలో మాత్రం ప్రత్యేకంగా కాంట్రాక్టర్​కు నిర్వహణ బాధ్యతలు అప్పగించారు. కరెంటు తీగలకు అడ్డుగా ఉన్న చెట్ల కొమ్మలను తొలగించి, తరలించాల్సి ఉంటుందని విద్యుత్​శాఖ అధికారి తెలిపారు. ఎక్కడైనా కాంట్రాక్టర్‌‌ తొలగించడకుండా రోడ్లపై పడేస్తే జరిమానా విధించే నిబంధన కూడా ఉందన్నారు. ఇకపై దీనిపై దృష్టి సారిస్తామని చెప్పారు.