ఇతరుల పేర్లపై భూముల ఎంట్రీ
మహబూబ్నగర్, వెలుగు: ఏండ్లు గడుస్తున్నా ‘ధరణి’లో తప్పులను సరిదిద్దకపోవడంతో గిరిజన రైతులు గోస పడుతున్నరు. వారి పేరు మీద ఉన్న పట్టా భూములను పోర్టల్లో ఇతరుల పేరు మీద ఎక్కించిన ఆఫీసర్లు వారికే డిజిటల్పాసు పుస్తకాలు సైతం ఇచ్చారు. డిజిటల్పాసు బుక్కులు అందుకున్న వ్యక్తులు ఆ భూములను ఇతరులకు విక్రయిస్తుండటంతో అసలు రైతులు ఆందోళనకు దిగుతున్నారు. న్యాయం చేయాలని ఏండ్లుగా రెవెన్యూ ఆఫీసర్ల చుట్టూ తిరుగుతున్నా పట్టించుకోవడం లేదు. మహబూబ్నగర్ జిల్లా బాలానగర్ మండలంలోని బిల్డింగ్తండా కొత్త గ్రామ పంచాయతీగా ఏర్పాటైంది. ఈ పంచాయతీ కింద బాలాజీగుట్ట తండా, నాచారం తండా, గున్యా తండా, కోయిల్కుంట తండాలు ఉన్నాయి. ఇందులో బాలాజీతండా, బిల్డిండ్తండాలో 350 ఇండ్లు ఉండగా 120 మంది రైతులు ఉన్నారు. ఇందులో వంద మంది రైతులకు సర్వే నంబర్లు 262, 263, 264, 265, 266, 267, 268, 269, 270, 271, 272లో 220 ఎకరాల భూమి వారసత్వంగా వచ్చింది. రెవెన్యూ రికార్డుల్లో కూడా వీరి పేరే ఉంది. కానీ 2017లో నిర్వహించిన ల్యాండ్రికార్డ్స్ అప్డేటింగ్ప్రోగ్రాం(ఎల్ఆర్ యూబీ) తర్వాత వీరికి సమస్యలు మొదలయ్యాయి. అప్పట్లో తండాలను విజిట్చేసిన ఆర్ఐ, తహసీల్దార్, గిర్దావర్రైతుల నుంచి పట్టాదారు పాసు పుస్తకాలు, ఆధార్ కార్డులను తీసుకున్నారు. మీ భూమి వివరాలను ఆన్లైన్లో ఎంట్రీ చేస్తామని చెప్పారు. అయితే ధరణిలో చాలామంది భూ వివరాలు ఇతరుల పేరు మీద ఎంట్రీ అయ్యాయి. పాస్ బుక్కులు కూడా వారికే వచ్చాయి. ఇందులో కొందరికి అసలు భూమి లేకున్నా, వారి పేరు మీద భూమి ఉన్నట్లు ఆఫీసర్లు బుక్కులు ఇచ్చారు. అసలైన రైతుల పేరు మీద ఎలాంటి భూమి చూపించడం లేదు. కొందరు రైతులకు రెండు, మూడు ఎకరాలు ఉంటే, ధరణిలో కేవలం ఎకరా, అర ఎకరా ఉన్నట్లు ఎంట్రీ చేశారు.
భూములు అమ్మేస్తున్నరు
బాలాజీగుట్ట తండా, బిల్డింగ్తండాలు హైదరాబాద్కు 60, శంషాబాద్కు 30 కిలోమీటర్ల దూరం ఉండటం, ఎన్హెచ్-44కు ఆరు కిలోమీటర్ల దూరమే ఉండటంతో ఇక్కడ భూములకు విపరీతమైన డిమాండ్ ఉంది. ఇప్పటికే ఈ ఏరియాలో రియల్వెంచర్లు, ఫామ్హౌస్లు ఏర్పాటయ్యాయి. అసలు రైతులకు కాకుండా వేరే వారికి పట్టాదారు పాసు పుస్తకాలు రావడం, ధరణిలో వారి పేరే ఉండటంతో ఏడాదిగా వారు భూములను అమ్మకానికి పెట్టారు. ఇప్పటికే నలుగురు రైతులకు చెందిన భూములను షాద్నగర్, ఫరూక్నగర్ మండలాలకు చెందిన టీఆర్ఎస్ లీడర్లకు ఎకరం రూ. 70 లక్షల చొప్పున అమ్మేశారు. అసలు రైతులు ఈ భూములు తమవని, మీరెట్లా కొంటారని ప్రశ్నిస్తే మా డబ్బులు మాకు తిరిగిస్తే మీ భూములు ఇస్తామని చెబుతున్నారు.
తిరిగి తిరిగి విసిగిపోయిన్రు
2018 నుంచి రైతులు తమకు న్యాయం చేయాలని రెవెన్యూ ఆఫీసర్ల చుట్టూ తిరుగుతున్నా ఎవరూ పట్టించుకోవడం లేదు. ప్రజావాణి, ఇతర సందర్భాల్లో ఇప్పటివరకు దాదాపు 30 సార్లు కంప్లైంట్చేసినా స్పందన రాలేదు. తహసీల్దార్దగ్గరే సమస్యను పరిష్కరించుకోమని కలెక్టర్ చెబుతున్నారని రైతులు అంటున్నారు. తహసీల్దార్దగ్గరకు వెళితే ఆర్డీవో వద్దకు వెళ్లండని సమాధానం ఇస్తున్నారని తెలిపారు. ఏడాదిన్నర కిందట ఈ ప్రాంతానికి చెందిన ఓ ఆర్ఐ ఎకరాకు రూ.2 వేలు ఇస్తే మీ భూములు ధరణిలో ఎక్కిస్తామని బాధితుల నుంచి రూ.1.70 లక్షలు వసూలు చేశాడు. కానీ పని చేయలేదు. ప్రస్తుతం ఆయన స్థానంలో మరో వ్యక్తి అక్కడ డ్యూటీలో ఉన్నాడు.
ఎంక్వైరీ చేస్తాం
ధరణిలో ఎడిట్ ఆప్షన్ లేదు. గతంలో ఎల్ఆర్యూబీలో ఇచ్చిన వివరాల ప్రకారం ఆన్లైన్లో ఎంట్రీ చేశారు. కొందరు ఈ భూములను అమ్ముతున్నారు. ఈ విషయం తెలిసి రైతులు కంప్లైంట్చేస్తే రిజిస్ట్రేషన్ కాకుండా ఆపుతున్నాం. త్వరలో రెండు టీంలను ఏర్పాటు చేస్తాం. ఎవరెవరికి భూ సమస్యలు ఉన్నాయో తెలుసుకుంటాం. తర్వాత ఆ రిపోర్ట్కలెక్టర్కు పంపిస్తాం.
– శ్రీనివాసులు, తహసీల్దార్, బాలానగర్
