ఖిల్లాగణపురం, వెలుగు: మండలంలోని మామిడిమాడ, శాపూరు గ్రామాల శివారులో 480 ఎకరాల భూమిని సాగు చేస్తున్న తమకు పట్టాలు ఇవ్వాలని డిమాండ్ చేస్తూ గిరిజనులు శుక్రవారం జిల్లా కేంద్రానికి పాదయాత్ర నిర్వహించారు. మండలంలోని వెనికితండా, ముందరితండా, మేడిబాయితండా, బక్కతండా, కర్నెతండా, ఆముదాలబండ తండా, బిజినేపల్లి మండలం భీమునితండా, మిట్టతండా గిరిజనులు 150 ఏండ్లుగా రాజాబహదూర్ కరణ్చంద్, శ్యాంకరణ్ పేరిట ఉన్న భూమిని సాగుచేసుకుంటున్నారు.
2019లో అప్పటి కలెక్టర్ సీసీఎల్ఏకు రిపోర్ట్ పంపారని, అయినప్పటికీ పట్టాలు ఇవ్వలేదని పేర్కొన్నారు. ల్యాండ్ సీలింగ్ యాక్ట్ ప్రకారం సాగులో ఉన్న వారికి పట్టాలు ఇప్పించాలని గిరిజన సంఘాల నాయకులు కోరారు. కృష్ణానాయక్, బాల్యానాయక్, జాత్రునాయక్, ఆంజనేయులు, వెంకటరాములు, నిక్సన్ పాల్గొన్నారు. అనంతరం వనపర్తి ఆర్డీవో సుబ్రహ్మణ్యంకు వినతిపత్రం అందజేశారు.
