- కలెక్టరేట్ ఎదుట గడ్డిమోపు దహనం
- మంత్రి జగదీశ్ రెడ్డి కాన్వాయ్ని అడ్డుకునే యత్నం
- నిరసనకారుల అరెస్ట్
యాదాద్రి, వెలుగు : ట్రిపుల్ ఆర్ బాధితుల ఆందోళన ఉద్రిక్తంగా మారింది. మంగళవారం కలెక్టరేట్ఎదుట ఎండు గడ్డి మోపును దహనం చేసి నిరసన వ్యక్తం చేశారు. తెలంగాణ దశాబ్ది ఉత్సవాల ఏర్పాట్లపై రివ్యూ నిర్వహించడానికి వచ్చిన మంత్రి జగదీశ్రెడ్డి, ఎమ్మెల్యేల కార్లను అడ్డుకోవడానికి యత్నించారు. దీంతో పోలీసులు ఆందోళనకారులతో పాటు మద్దతుగా వచ్చిన బీజేపీ, కాంగ్రెస్ లీడర్లను అరెస్ట్ చేసి వివిధ పోలీస్స్టేషన్లకు తరలించారు. యాదాద్రి జిల్లా మీదుగా వెళ్తున్న ట్రిపుల్ఆర్ వల్ల పలువురు రైతులు భూములు కోల్పోతున్నారు. గతంలో పలుమార్లు భూములు కోల్పోయినందున, ప్రస్తుత అలైన్మెంట్మార్చాలని ఆందోళనలు నిర్వహిస్తున్నారు. ఇందులో భాగంగా యాదాద్రి కలెక్టరేట్వద్ద సోమవారం 48 గంటల ఆందోళన మొదలుపెట్టారు. మంగళవారం రెండో రోజు కూడా కొనసాగగా, తెలంగాణ దశాబ్ది ఉత్సవాల నిర్వహణ రివ్యూ కోసం యాదాద్రి కలెక్టరేట్కు మంత్రి గుంటకండ్ల జగదీశ్ రెడ్డి వచ్చారు. దీంతో తమను కలుస్తారని బాధితులు ఆశించారు. గంటలు గడిచినా అలాంటిదేమీ జరగకపోవడంతో అసహనానికి గురై అలైన్మెంట్ మార్చాలని డిమాండ్ చేస్తూ కలెక్టరేట్లోకి చొచ్చుకెళ్లడానికి ప్రయత్నించారు. వీరికి మద్దతుగా బీజేపీ స్టేట్ లీడర్గూడూరు నారాయణరెడ్డి, కాంగ్రెస్ లీడర్ తంగెళ్లపల్లి రవికుమార్ ముందు నడిచారు. అయితే, యాదాద్రి డీసీపీ రాజేశ్చంద్ర, పోలీసులు వీరిని అడ్డుకున్నారు. దీంతో ఇరువర్గాల మధ్య వాగ్వాదం జరిగింది. ఇదే సమయంలో కొందరు బాధితులు గడ్డిమోపు తెచ్చి కలెక్టరేట్ఎదుట వేసి నిప్పు పెట్టారు. దీంతో పరిస్థితి ఉద్రిక్తంగా మారింది. మరికొందరు రాస్తారోకో చేశారు. వీరిని చెదరగొట్టేందుకు పోలీసులు ప్రయత్నించారు. మంత్రిని అడ్డుకుంటారనే ఉద్దేశంతో కలెక్టరేట్లోని మరో రోడ్డు మీదుగా మంత్రి జగదీశ్ రెడ్డి కాన్వాయ్ను బయటకు పంపించారు. గమనించిన ఆందోళనకారులు అలైన్మెంట్ మార్చాలని నినాదాలు చేస్తూ కాన్వాయ్ అడ్డుకోవడానికి దూసుకెళ్లారు. వెంటనే పోలీసులు అడ్డుకున్నారు. అనంతరం బీజేపీ, కాంగ్రెస్ లీడర్లు సహా ఆందోళనకారులను పోలీసులు అరెస్ట్ చేసి జిల్లాలోని వివిధ పోలీస్ స్టేషన్లకు తరలించారు.
