- ఏప్రిల్ 2 నుంచి అమల్లోకి తెస్తాం: ట్రంప్
- అమెరికాలోనే తయారయితే నో ట్యాక్స్
- దేశీయ ఆటోమొబైల్ ఇండస్ట్రీని బలోపేతం చేస్తామని వెల్లడి
- టిక్టాక్ ను అమ్మితే టారిఫ్లు తగ్గిస్తామని చైనాకు ఆఫర్
వాషింగ్టన్: విదేశాల్లో తయారై అమెరికాకు దిగుమతి అయ్యే వాహనాలపై 25 శాతం పన్ను విధిస్తున్నట్లు యూఎస్ ప్రెసిడెంట్ డొనాల్డ్ ట్రంప్ ప్రకటించారు. ఈ ట్యాక్స్ శాశ్వతంగా ఉంటుందని తేల్చి చెప్పారు. అమెరికాలో తయారయ్యే వెహికల్స్పై మాత్రం ఎలాంటి ట్యాక్స్ ఉండదన్నారు. దేశీయ తయారీ రంగాన్ని బలోపేతం చేసేందుకే ఈ నిర్ణయం తీసుకున్నట్లు వెల్లడించారు. ఏప్రిల్ 2 నుంచి ఈ 25 శాతం ఇంపోర్ట్ ట్యాక్స్ అమల్లోకి వస్తుందన్నాప్పారు. కాగా, ట్రంప్ నిర్ణయంతో గ్లోబల్ సప్లై చైన్ దెబ్బతింటుందని నిపుణులు ఆందోళన వ్యక్తం చేస్తున్నారు. కొనుగోళ్లు యథావిధిగా కొనసాగితే.. అమెరికాకు ఏడాదికి రూ.8.50 లక్షల కోట్ల ఆదాయం వస్తుందని యూఎస్ ఆటో తయారీ సంస్థలు తెలిపాయి. కొనుగోళ్లు భారీగా పడిపోయే అవకాశం ఉందని చెప్పాయి. కాగా, చైనాపై టారిఫ్‌‌ల విషయంలో ఆ దేశానికి ట్రంప్ ఓ ఆఫర్ ప్రకటించారు. షార్ట్‌ వీడియో యాప్‌ టిక్టాక్ ను తమకు అమ్మేస్తే టారిఫ్లు తగ్గిస్తామన్నారు. అవసరమైతే ఒప్పందం గడువును కూడా పెంచుతామని చెప్పారు. కాగా, టిక్‌‌టాక్‌‌ను నిషేధిస్తున్నట్లు అమెరికా ఇప్పటికే ప్రకటించింది. జనవరి 18న ఆ యాప్‌‌ను ప్లే స్టోర్ల నుంచి గూగుల్, యాపిల్‌ తొలగించాయి. మరోవైపు ట్రంప్ తాజా టారిఫ్పై కెనడాతోపాటు యూరోపియన్ దేశాలు విమర్శలు గుప్పించాయి.
ఇండియాను చైనా, కెనడా, మెక్సికోలా ట్రీట్ చేయం
చైనా, కెనడా, మెక్సికోతో ఇండియాను చూడబోమని అమెరికా పేర్కొన్నది. ట్రంప్ విధించిన పరస్పర సుంకాలు ఏప్రిల్ 2 నుంచి అమల్లోకి రానున్న నేపథ్యంలో ఇండియా, అమెరికా మధ్య వాణిజ్యపరమైన ఒప్పందానికి సంబంధించిన చర్చలు ఢిల్లీలో ప్రారంభమయ్యాయి. అమెరికా ట్రేడ్ ఆఫీసర్ బ్రెండన్‌ లించ్‌ తన బృందంతో కలిసి ఇండియా వచ్చారు. ఈ సందర్భంగా ఇండియాను ఉద్దేశిస్తూ ఆయన కీలక కామెంట్లు చేశారు. ‘‘ట్రంప్ పాలనలో చైనా, మెక్సికో, కెనడా వంటి దేశాలతో ఇండియాను కలిపి చూడటం లేదు. ఆ దేశాలతో కరెన్సీ అవకతవకలు, అక్రమ వలసలు, ఇతర సమస్యలు ఉన్నాయి’’అని వివరించారు.
