-
2000 పౌండ్ల బరువైన బాంబులు పంపుతున్నామని వెల్లడి
వాషింగ్టన్: అమెరికా అధ్యక్ష పగ్గాలు చేపట్టాక డొనాల్డ్ ట్రంప్ దూకుడుగా వ్యవహరిస్తున్నారు. గాజాలోని రఫాలో విధ్వంస తీవ్రతను తగ్గించేందుకు గత బైడెన్ సర్కారు తీసుకొన్న నిర్ణయాన్ని తాజా ప్రెసిడెంట్ ట్రంప్ ఎత్తేశారు. ఇజ్రాయెల్కు బంకర్‌ బస్టర్‌ బాంబుల సరఫరాను పునరుద్ధరించాలని నిర్ణయించారు.
2,000 పౌండ్ల బరువున్న బాంబులను సరఫరా చేసేందుకు ట్రంప్ గ్రీన్‌ సిగ్నల్‌ ఇచ్చినట్టు వైట్హౌస్ వర్గాలు వెల్లడించాయి. రాబోయే రోజుల్లో దాదాపు 1,800 ఎంకే 84 బాంబులను ఇజ్రాయెల్కు సరఫరా చేయనున్నట్టు తెలిపాయి. అలాగే, ట్రంప్ నిర్ణయాన్ని ఇజ్రాయెల్కు చేరవేసినట్టు పేర్కొన్నాయి.
ఇజ్రాయెల్కు బాంబులు పంపిస్తున్నాం: ట్రంప్
ఇజ్రాయెల్ చాలా వస్తువులను అమెరికానుంచి ఆర్డర్ చేసిందని, వాటికోసం డబ్బులు కూడా చెల్లించిందని ట్రంప్ పేర్కొన్నారు. కానీ.. వాటిని బైడెన్ ఆపేశారని, ప్రస్తుతం వాటిని తాము పంపిస్తున్నామని ట్రూత్ వేదికగా వెల్లడించారు. ప్రస్తుతం 2000 పౌండ్ల బరువున్న బాంబులు ఇజ్రాయెల్కు బయలుదేరాయని వెల్లడించారు.
గాజా స్ట్రిప్ను క్లీన్ చేసేందుకు ఎక్కువ సంఖ్యలో పాలస్తీనా శరణార్థులను ఈజిప్ట్, జోర్డాన్, ఇతర అరబ్ దేశాలు తమ దేశాల్లోకి అంగీకరించాలని ఆయన కోరారు. ఇప్పటికే ఆయా దేశాలతో మాట్లాడానని చెప్పారు.
