- అమెరికా ప్రెసిడెంట్ ట్రంప్ వార్నింగ్
- పనామా ప్రెసిడెంట్ ములినోతో యూఎస్ విదేశాంగ మంత్రి భేటీ
న్యూయార్క్: అమెరికా అధ్యక్షుడిగా పగ్గాలు చేపట్టాక పొరుగు దేశాలతో దూకుడుగా వ్యవహరిస్తున్న డొనాల్డ్ ట్రంప్ మరో సంచలన ప్రకటన చేశారు. ఇప్పటికే కెనడా, మెక్సికో, చైనాలపై సుంకాలతో విరుచుకుపడిన ఆయన.. తాజాగా పనామా కాలువపై ఆసక్తికర వ్యాఖ్యలు చేశారు. పనామా కాలువపై కీలక నిర్ణయాలుంటాయని హెచ్చరించారు. ఆ కాలువను బలవంతంగా తీసుకుంటామని సంకేతాలిచ్చారు. ‘అట్లాంటిక్, పసిఫిక్ మహా సముద్రాలను కలిపే కీలకమైన జలమార్గమైన పనామాను మేం చైనాకు ఇవ్వలేదు. అయినా.. చైనా దీన్ని పరోక్షంగా నిర్వహిస్తున్నది. ఒప్పందాన్ని పనామా ఉల్లంఘిస్తున్నది. అందుకే మే కాలువను వెనక్కు తీసుకుంటాం. త్వరలోనే దీనిపై పవర్ఫుల్ నిర్ణయం ఉంటుంది” అని చెప్పారు. అయితే, ఇందుకు సైనిక బలగాల అవసరం ఉండకపోవచ్చని ఆయన అభిప్రాయపడ్డారు.
పనామాపై చర్యలు తీసుకుంటాం: రుబియో
పనామా ప్రెసిడెంట్ జోస్రౌల్ ములినోతో అమెరికా విదేశాంగ మంత్రి మార్కో రుబియో భేటీ అయ్యారు. పనామా కాలువపై చైనా జోక్యాన్ని, నియంత్రణను అడ్డుకోవాలని సూచించారు. లేకుంటే పనామా విషయంలో అమెరికా తగిన చర్యలు తీసుకుంటుందని హెచ్చరించారు. కాగా, మీటింగ్ అనంతరం పనామా అధ్యక్షుడు ములినో మీడియాతో మాట్లాడారు. రుబియోతో సమావేశం గౌరవప్రదంగా, స్నేహపూర్వకంగా జరిగిందని చెప్పారు. అమెరికా బెదిరింపులు, దురాక్రమణలకు తాము భయపడబోమని తేల్చిచెప్పారు. పనామా విషయంలో తాము చర్చలకు ప్రతిపాదించినట్టు చెప్పారు.
చైనాతో ఒప్పందంపై పనామా వెనక్కి
చైనా బెల్ట్ అండ్ రోడ్ ఇన్షియేటివ్ నుంచి తప్పుకోవాలని పనామా నిర్ణయించింది. 2017లో చైనాతో చేసుకున్న ఒప్పందాన్ని తాము పునరుద్ధరించబోమని పనామా ప్రెసిడెంట్ ములినో ప్రకటించారు.
మెక్సికోపై టారిఫ్లు నెల నిలిపివేత
మెక్సికో వస్తువులపై అమెరికా విధించిన 25% టారిఫ్ ల అమలుకు నెల రోజులు బ్రేక్ పడింది. మంగళవారం నుంచి టారిఫ్ లు అమలులోకి రావాల్సి ఉండగా.. ఇరుదేశాల ప్రెసిడెంట్లు క్లాడియా షేన్ బామ్, ట్రంప్ సోమవారం చర్చలు జరిపారు. టారిఫ్ల అమలును నెల రోజులు నిలిపివేస్తున్నట్టు వేర్వేరుగా ప్రకటించా రు. కెనడాపై టారిఫ్ల విషయంలోనూ ట్రూడో తో మాట్లాడానని, సోమవారం మధ్యాహ్నం మరోసారి మాట్లాడతానని ట్రంప్ చెప్పారు.
