- రష్యా ప్రెసిడెంట్ గురించి ఆందోళన చెందొద్దు
- అమెరికన్లకు ప్రెసిడెంట్ డొనాల్డ్ ట్రంప్ సూచన
న్యూయార్క్: రష్యా ప్రెసిడెంట్ పుతిన్ గురించి అమెరికన్లు ఆందోళన చెందొద్దని అమెరికా అధ్యక్షుడు డొనాల్డ్ ట్రంప్ ఆ దేశ ప్రజలకు సూచించారు. పుతిన్కంటే అక్రమ వలసదారులే డేంజర్ అని వ్యాఖ్యానించారు. ఈ మేరకు సోషల్ మీడియా ప్లాట్ఫామ్ ‘ట్రూత్’ వేదికగా ట్రంప్ కీలక వ్యాఖ్యలు చేశారు. ‘‘మనం పుతిన్ గురించి ఎక్కువ ఆందోళన చెందాల్సిన అవసరం లేదు.
మన దేశంలోకి అక్రమంగా ప్రవేశిస్తున్న మైగ్రేంట్స్, రేప్ గ్యాంగ్స్, డ్రగ్లార్డ్స్, మర్డరర్స్, మానసికంగా ఇబ్బందిపడుతున్న వారిపై మనం దృష్టి పెట్టాలి” అని ప్రజలనుద్దేశించి ట్రంప్ వ్యాఖ్యానించారు. అలాగే, తన జాతీయ భద్రతా మాజీ సలహాదారు హెచ్ఆర్ మెక్మాస్టర్పై ట్రంప్ విరుచుకుపడ్డారు. ఇటీవలి పరిణామాలతో పుతిన్ సంతోషంగా ఉండలేరు అని మెక్మాస్టర్ చేసిన వ్యాఖ్యలపై తీవ్రంగా స్పందించారు. మెక్మాస్టర్ ఓ బలహీనమైన, పూర్తిగా పనికిరానివాడని ముద్ర వేశారు.
రష్యాకు అనుకూలంగా వైట్హౌస్: సెనేటర్ మర్ఫీ
వైట్హౌస్ను డొనాల్డ్ ట్రంప్ రష్యాకు అనుకూలంగా మార్చేశారని డెమోక్రటిక్ సెనేటర్ క్రిస్మర్ఫీ విమర్శించారు. ట్రంప్ చర్యలతో క్రూరమైన నియంతృత్వానికి దగ్గరవుతున్నామని, ఇది విచారకరమైన రోజు అని పేర్కొన్నారు. అమెరికా చేసిన సాయానికి ఉక్రెయిన్ కృతజ్ఞత తెలుపకుండానే వెళ్లేలా ట్రంప్, వైస్ ప్రెసిడెంట్ జేడీ వాన్స్ వ్యవహరించారని మండిపడ్డారు.
