అమెరికా అధ్యక్ష హోదాలో డొనాల్డ్ ట్రంప్ ఈరోజు ఇండియాకి తొలిసారి వస్తున్నారేమో గానీ ఆయనకు బిజినెస్పరంగా మన దేశంతో ఎప్పటినుంచో సంబంధాలు ఉన్నాయి. ట్రంప్ రియల్ ఎస్టేట్ ప్రాజెక్టులు నార్త్ అమెరికా బయట ఇండియాలోనే ఎక్కువ ఉన్నాయి. ఈ విషయాన్ని స్వయంగా ఆయన కొడుకే (డొనాల్డ్ ట్రంప్ జూనియర్) చెప్పారు. ఈ వ్యాపారాలను చూసుకునేందుకు జూనియర్ ట్రంప్ మన దేశానికి చాలా సార్లు వచ్చిపోతుంటారు. సీనియర్ ట్రంప్ కూడా చివరిసారిగా 2014లో వచ్చివెళ్లారు.
అద్భుతమైన మార్కెట్
ట్రంప్ మన దేశంలోని వెంచర్లను మారుపేర్లతో కాకుండా నేరుగా ట్రంప్ టవర్స్ అనే బ్రాండ్ నేమ్తోనే బిజినెస్ చేస్తున్నారు. ఆ కుటుంబానికి ఇక్కడ ఉన్న మొత్తం ఆస్తుల సంఖ్య ఐదు. వాటిలో 4 లగ్జరీ రెసిడెన్షియల్ ప్రాజెక్టులు. ఒకటి ఆఫీస్ టవర్. ఈ అద్దాల మేడలు పుణె, ముంబై, కోల్కతాలలో ఒక్కొక్కటి చొప్పున, గుర్గావ్లో రెండు ఉన్నాయి. ఇండియా రియల్ ఎస్టేట్ను తాను ఎమర్జింగ్ మార్కెట్లా కాకుండా అమేజింగ్ మార్కెట్లా చూస్తానని ట్రంప్ అప్పట్లో అన్నారు.
ట్రంప్ పేరిట ఉన్న టవర్ల వివరాలు..
పుణెలో 23 అంతస్తుల చొప్పున రెండు టవర్లు కట్టారు. పంచ్శీల్ రియాల్టీ సంస్థను పార్ట్నర్గా పెట్టుకున్నారు. ముంబైలో 75 ఫోర్లతో ఆకాశాన్నంటే అపార్ట్మెంట్ లేపారు. మ్యాక్రోటెక్ డెవలపర్స్ కంపెనీని భాగస్వామిగా చేర్చుకున్నారు. కోల్కతాలో రెసిడెన్షియల్ టవర్ నిర్మాణం నడుస్తోంది. దీనికోసం యూనిమార్క్ అండ్ ట్రిబెకా డెవలపర్స్తో జతకలిశారు. గుర్గావ్లోని ఆఫీస్ అండ్ రిటైల్ కాంప్లెక్స్ నిర్మాణం ఇప్పుడు ఏ స్థితిలో ఉందో తెలియదు. అక్కడి మరో రెసిడెన్షియల్ టవర్స్ కన్స్ట్రక్షన్ కూడా పూర్తి కాలేదు. దీనికి ఎం3ఎం అండ్ ట్రిబెకా డెవలపర్స్ సహకరిస్తోంది.
ఇరియో సిటీలో ఆఫీస్ టవర్
ట్రంప్ ఆర్గనైజేషన్.. రియల్ ఎస్టేట్ ప్రైవేట్ ఈక్విటీ సంస్థ ఇరియోతో పార్ట్నర్షిప్ పెట్టుకుంటున్నట్లు 2016లో చెప్పింది. ఇరియో ఫౌండర్ లలిత్ గోయెల్. ఢిల్లీ అధికార పార్టీ లీడర్ సుధాంశు మిట్టల్కి ఈయన బావ. ఈ సంస్థపై 2018లో ఆర్థిక అవకతవకల ఆరోపణలు పెద్దఎత్తున వచ్చాయి. ఈ నేపథ్యంలో ఇరియోతో ప్రస్తుతం డొనాల్డ్ ట్రంప్ సంస్థకు వ్యాపార భాగస్వామ్యం కొనసాగుతోందా లేదా అనేది క్లియర్గా తెలియదు. ఇరియో వెబ్సైట్లో కూడా ట్రంప్ ప్రాజెక్టు గురించిన ప్రస్తావన లేదు.
ఢిల్లీకి దగ్గరలో రెండు బిల్డింగ్లు
ట్రంప్ రియల్ ఎస్టేట్ సంస్థ గుర్గావ్లో రెండు టవర్ల నిర్మాణం చేపడుతోంది. ఒక్కోదాన్ని 600 అడుగుల ఎత్తులో కట్టనున్నారు. 2 వేల కోట్ల డాలర్లు ఖర్చు పెట్టి 250కి పైగా లగ్జరీ అపార్ట్మెంట్లను నిర్మించనున్నారు. 2018లో మొదలుపెట్టిన ఈ వెంచర్ కన్స్ట్రక్షన్ ప్రస్తుతం ప్రారంభ దశలోనే ఉంది. ట్రిబెకా డెవలపర్స్ అనే సంస్థ ట్రంప్ ఆర్గనైజేషన్తో ఏడేళ్లుగా కలిసి పనిచేస్తోంది. ఇండియాలో ట్రంప్ బ్రాండెడ్ ప్రాజెక్టులకు సరిపడే సైట్లను వెతికి పెడుతుంది.
పెదవి విప్పని పార్టనర్లు
అమెరికా అధ్యక్ష హోదాలో డొనాల్డ్ ట్రంప్ మొదటిసారిగా ఇండియాకి వస్తుండటంతో అధికారికంగా వారం పది రోజుల ముందు నుంచే హడావుడి నెలకొంది. మన దేశంలో ఎక్కడకి వెళ్లినా ఆయనకు సంబంధించిన ముచ్చట్లే వినిపిస్తున్నాయి. కానీ.. ట్రంప్కి ఇక్కడ బిజినెస్ పార్ట్నర్లుగా ఉన్నోళ్లు మాత్రం ఆయన పర్యటనపై మాట వరసకైనా పెదవి విప్పట్లేదు. ‘ఈ టూర్పై మీ అభిప్రాయమేంటి’ అని అడిగితే ఇద్దరు భాగస్వాములు కనీసం రెస్పాండే కాలేదు. మరో ఇద్దరు నిర్మొహమాటంగా ‘నో కామెంట్’ అనేశారు.
అమెరికాలోని ట్రంప్ ఆర్గనైజేషన్ కూడా ఇండియన్ వెంచర్ల గురించి అడిగిన కొన్ని ప్రశ్నలకు ఆన్సర్ చెప్పకుండా మౌనం పాటించింది. అయితే, ఎవరేం మాట్లాడకపోయినా జూనియర్ ట్రంప్ మాత్రం స్పందించారు. ‘మా సంస్థ ఇండియాలో విజయాలను కొనసాగిస్తుండటం మాకు ఎంతో గర్వంగా ఉంది’ అన్నారు.
ఆరేళ్ల కిందట.. ఆశ్చర్యకరంగా..
పుణేకి డొనాల్డ్ ట్రంప్ రావటం 2014లో పెద్ద వార్త. ప్రైవేట్ జెట్లో చేరుకున్న ఆయన సిటీలోని పెద్దోళ్లకు పార్టీ ఇవ్వటం చర్చకు దారితీసింది. ఎందర్నో ఆశ్చర్యపరిచింది. ఇక్కడ కళ్లు చెదిరే రీతిలో కట్టిన రెండు ట్రంప్ టవర్స్లో ఆయన ఆస్తులు చాలా ఉన్నాయి. 4,400 స్క్వేర్ ఫూట్ అపార్ట్మెంట్ల కనీస రేటు 19.5 లక్షల డాలర్లు. ఈ రెండు బిల్డింగ్లను అతుల్, సాగర్ చోర్డియా అనే సోదరులు సొంతం చేసుకున్నట్లు పంచ్శీల్ రియాల్టీ సంస్థ చెప్పింది. డొనాల్డ్ ట్రంప్ అమెరికా ప్రెసిడెంట్గా ఎన్నికైన తర్వాత న్యూయార్క్లోని ట్రంప్ టవర్లో ఈ అన్నదమ్ములు ఆయన్ని ఓసారి కలిశారు. ట్రంప్ ఇకపై బిజినెస్లో కొనసాగుతారో లేదోననే ఆందోళనలు అప్పట్లో ఉండేవి. ఈ నేపథ్యంలో వీళ్ల మధ్య గొడవలొచ్చాయి. తర్వాత ఏమైందో తెలియదు.
కోల్కతాలో హాట్కేకుల్లా..
కోల్కతాలో ట్రంప్ టవర్ మొదలైన రెండు నెలల్లోనే దాదాపు సగం యూనిట్లు హాట్కేకుల్లా సేల్ అయినట్లు తెలుస్తోంది. ఖైతాన్ అండ్ కంపెనీలో ఫైనాన్స్ డైరెక్టర్గా పనిచేసే సుమిత్ భలోటియా ఈ బిల్డింగ్ గురించి మాట్లాడుతూ ‘ఇది అమెరికా ప్రెసిడెంట్కి సంబంధించిన ప్రాపర్టీ కాబట్టి ఇందులో పెట్టుబడి పెట్టేందుకు వెనకా ముందు ఆలోచించాల్సిన అవసరం లేదు’ అన్నారు. ట్రంప్ అమెరికా అధ్యక్షుడు కాకముందు ఆయన వ్యాపార సామ్రాజ్యం గురించి తనకు తెలియదని చెప్పారు. పోయినేడాది సెప్టెంబర్లో కోల్కతా, గుర్గావ్ రెసిడెన్షియల్ ప్రాజెక్టులవాళ్లు బయ్యర్లకు మూడు రోజుల న్యూయార్క్ ట్రిప్ ఏర్పాటుచేశారు. ఇందులో దాదాపు 150 మంది పాల్గొన్నారు. వాళ్లంతా ఓరోజు సాయంత్రం డొనాల్డ్ ట్రంప్ని కలిసి పార్టీ చేసుకున్నారు.
అపార్ట్మెంట్ కొంటే జెట్ సర్వీస్
ముంబైలో 75 అంతస్తులతో ఆకాశాన్నంటే రీతిలో ట్రంప్ టవర్ నిర్మించారు. అందులో అపార్ట్మెంట్లు కొన్నోళ్లకు ప్రైవేట్ జెట్ సర్వీస్ను ఆఫర్ చేశారు. ఈ ప్రాజెక్ట్కు ప్రమోటర్గా మ్యాక్రోటెక్ డెవలపర్స్ వ్యవహరించారు. ఈ సంస్థను మన దేశంలోనే ఎక్కువ డబ్బున్న రియల్ ఎస్టేట్ డెవలపర్గా చెప్పుకునే మంగల్ ప్రభాత్ లోధా స్థాపించారు. ప్రస్తుతం ఆ కంపెనీని ఆయన కొడుకు అభిషేక్ లోధా నడుపుతున్నారు. మ్యాక్రోటెక్ డెవలపర్స్ ఈమధ్య ఆర్థిక ఇబ్బందుల్లో చిక్కుకున్నట్లు వార్తలొచ్చాయి.
ముంబైలోని ట్రంప్ టవర్లో రెండు అపార్ట్మెంట్లు కొన్న డైమండ్ల వ్యాపారి రితేశ్ షా ఆ బిల్డింగ్ నిర్మాణాన్ని మెచ్చుకున్నారు. వాస్తుకు అనుగుణంగా ఉన్నట్లు తెలిపారు. మూడు బెడ్రూమ్లు ఉన్న అపార్ట్మెంట్ల ధర తక్కువలో తక్కువ 10.4 లక్షల డాలర్లని చెప్పారు. ట్రంప్ వ్యాపారం గురించీ ఆయన గొప్పగా అభిప్రాయపడ్డారు. ప్రపంచంలో రియల్ ఎస్టేట్కి ఒకే ఒక్క బ్రాండ్ నేమ్ డొనాల్డ్ ట్రంప్ అని, రెండో బ్రాండే లేదని తేల్చేశారు. ట్రంప్ ఇండియాకి వస్తున్న విషయంపై మాట్లాడేందుకు మాత్రం రితేశ్ ఒప్పుకోలేదు.
