తిమ్మాపూర్, వెలుగు: ఈదురు గాలులు, వర్షం కారణంగా విద్యుత్ సరఫరాలో అంతరాయం కలగడంతో ఎప్సెట్ ఆలస్యం కావడంతో విద్యార్థుల తల్లిదండ్రులు రాస్తారోకో చేశారు. కరీంనగర్ జిల్లా తిమ్మాపూర్ మండలం రామకృష్ణ కాలనీలోని వాగేశ్వరి అయాన్ డిజిటల్ జోన్ లో అగ్రికల్చర్, ఫార్మసీల్లో అడ్మిషన్ కోసం మధ్యాహ్నం 3 గంటల నుంచి సాయంత్రం 6 గంటల వరకు పరీక్ష నిర్వహించాల్సి ఉంది.
వర్షం, ఈదురు గాలులు, పిడుగు పడడంతో కరెంట్ సప్లై నిలిచిపోయింది. దీంతో విద్యార్థులకు గంటన్నర పాటు వెసులుబాటు కేటాయించారు. కాగా, తమ పిల్లలు ఇంకా ఎగ్జామ్ సెంటర్ నుంచి బయటకు రాకపోవడంతో తల్లిదండ్రులు ఆందోళనకు గురై ఎగ్జామ్ సెంటర్ వద్దకు తరలివచ్చారు. ఎగ్జామ్ సెంటర్లోకి తమను అనుమతించాలని ఆందోళనకు దిగడంతో నిర్వాహకులు నిరాకరించారు. దీంతో ఆగ్రహంతో కాలేజీ ముందు రాజీవ్ రహదారిపై రాస్తారోకో చేశారు.
ట్రాఫిక్ జామ్ కావడంతో పోలీసులు ఘటనా స్థలానికి చేరుకొని తల్లిదండ్రులకు నచ్చజెప్పేందుకు ప్రయత్నించారు. రాత్రి 7.30కు స్టూడెంట్స్ ఎగ్జామ్ రాసి రావడంతో శాంతించారు. కరీంనగర్ రూరల్ ఏసీపీ వెంకటరమణ ఘటనా స్థలానికి చేరుకొని సీఐ స్వామి, ఎస్ఐ చేరాలును వివరాలు అడిగి తెలుసుకున్నారు. ఆందోళనకారుల వివరాలను సేకరించి కేసు నమోదు చేస్తామని పోలీసులు తెలిపారు.
