హైదరాబాద్, వెలుగు: ఎంబీఏ, ఎంసీఏలో ప్రవేశాల కోసం నిర్వహించిన ఐసెట్ ఫస్ట్ ఫేజ్ సీట్ల కేటాయింపు ప్రక్రియ పూర్తయింది. మొత్తం 30,300 మందికి సీట్లు అలాట్ చేశారు. ఐసెట్ అడ్మిషన్ కౌన్సెలింగ్ లో మొత్తం 35,033 మంది సర్టిఫికెట్ వెరిఫికేషన్ లో పాల్గొనగా, 34,069 మంది వెబ్ ఆప్షన్లు ఇచ్చారు. మొత్తంగా 34,749 సీట్లు అందుబాటులో ఉండగా, వారిలో 30,300 మందికి సీట్లు అలాట్ అయ్యాయి.
ఎంబీఏలో 266 కాలేజీల్లో 27,951 సీట్లుంటే, 24,457 సీట్లు నిండాయి. ఎంసీఏలో 89 కాలేజీల్లో 6,797 సీట్లుంటే 5,843 సీట్లు భర్తీ అయ్యాయి. ఈడబ్ల్యూఎస్ కోటాలో మరో 1,130 మందికి సీట్లు కేటాయించారు. 91 కాలేజీల్లో వందశాతం సీట్లు నిండినట్టు అధికారులు ప్రకటించారు. సీట్లు పొందిన విద్యార్థులు ఈ నెల 17లోగా సెల్ఫ్ రిపోర్ట్ చేయాలని సూచించారు.
