సినీ ఇండస్ట్రీలో అవకాశాలు రాక గత నాలుగేళ్లుగా ఇంటికే పరిమితమైన ఓ బుల్లితెర నటుడు అర్ధాంతరంగా తనువు చాలించాడు. నివాసముంటున్న అపార్ట్‌మెంట్‌లోనే ఆత్మహత్యకు పాల్పడ్డాడు. ఈ విషాదకర ఘటన ముంబైలో చోటుచేసుకుంది.
రియాల్టీ షో 'దాదాగిరి 2' విజేత నితిన్ చౌహాన్ శవమై కనిపించారు. ఇతనికి భార్య, ఓ కుమార్తె. వీరిద్దరూ ఇంట్లో లేని సమయం చూసి ఆత్మహత్యకు పాల్పడ్డాడు. అవకాశాలు రాక నితిన్ గత నాలుగేళ్లుగా ఇంటికే పరిమితమయ్యాడు. దాంతో, డిప్రెషన్‌ బారిన పడి అతని మానసిక ఆరోగ్యం మరింత దిగజారిందని కుటుంబ సభ్యులు తెలిపారు. ఐస్‌క్రీం వ్యాపారం చేయాలనే ఆలోచన వచ్చినప్పటికీ, ఆర్థికంగా అంతంత మాత్రం కావడంతో అది ముందుకు సాగలేదని నటుడి భార్య వెల్లడించారు.
ఎటువంటి పని దొరక్క నితిన్ గత మూడు, నాలుగేళ్లుగా ఇంటి దగ్గర ఉంటున్నట్లు నటుడి భార్య పోలీసులకు వాంగ్మూలం ఇచ్చింది. తరచూ ఆలోచనల్లో లీనమై ఉండేవాడని పేర్కొంది. బిజినెస్ చేయాలని ఆలోచన ఉన్నప్పటికీ, సరిపడా డబ్బుల్లేక అది వాయిదా పడిందని వెల్లడించింది.
రియాల్టీ షో 'దాదాగిరి 2' విజేతగా నిలిచాక నితిన్ చౌహాన్ బాగా పాపులర్ అయ్యాడు. స్ప్లిట్స్‌విల్లా 5, జిందగీ డాట్ కామ్, క్రైమ్ పెట్రోల్, ఫ్రెండ్స్ వంటి రియాలిటీ షోలలో కనిపించాడు.
