- కేపీహెచ్బీ కాలనీలో ఘటన
కూకట్పల్లి, వెలుగు: కేపీహెచ్బీ కాలనీలో అన్నదమ్ములైన ఇద్దరు బాలురు అదృశ్యమయ్యారు. ఒక టెంపుల్లో వీరిద్దరు చోరీకి పాల్పడ్డారని ఆరోపణలు రావడంతో తల్లి మందలించింది. దీంతో అలిగి ఇంటి నుంచి వెళ్లిపోయి ఉంటారని కేపీహెచ్బీ పోలీసులు భావిస్తున్నారు.
ఏపీలోని అనంతపురం జిల్లా నీలకోట తండాకు చెందిన ఆనంద్నాయక్, చిట్టిబాయి దంపతులు. మూడు నెలల కిందట ఉపాధి కోసం సిటీకి వచ్చి కేపీహెచ్బీ నాలుగో ఫేజ్లోని శివాలయం సమీపంలో నివాసం ఉంటున్నారు. వీరికి ఏడో తరగతి చదువుతున్న గణేశ్నాయక్(13), ఐదో తరగతి చదువుతున్న రాకేశ్నాయక్(10) అనే ఇద్దరు కొడుకులు ఉన్నారు. రెండు రోజుల క్రితం ఆనంద్నాయక్ స్వగ్రామానికి వెళ్లాడు.
హౌస్ కీపర్గా పని చేసే చిట్టిబాయి గురువారం ఉదయం పనికి వెళ్తూ ఇద్దరు కొడుకులను ఇంట్లోనే ఉంచి వెళ్లింది. మధ్యాహ్నం ఇంటికి తిరిగి వచ్చేసరికి ఆమె ఇద్దరు కొడుకులు టెంపుల్లో చోరీ చేసినట్లు నిర్వాహకులు ఆరోపించారు. దీంతో ఆమె తన ఇద్దరు కొడుకులను మందలించింది. ఆ తర్వాత ఆడుకుంటామని చెప్పి బయటకు వెళ్లిన అన్నదమ్ములు ఇంటికి తిరిగిరాలేదు. ఎక్కడా వెతికినా ఫలితం లేకపోవడంతో చిట్టిబాయి శుక్రవారం పోలీసులకు ఫిర్యాదు చేసింది. దీంతో కేపీహెచ్బీ పోలీసులు కేసు నమోదు చేసి దర్యాప్తు చేస్తున్నారు.
