హైదరాబాద్ - శ్రీశైలం హైవేపై ఘోర ప్రమాదం జరిగింది.. కందుకూరు పోలీస్ స్టేషన్ పరిధిలోని ముచ్చర్ల గేటు సమీపంలో ఓ కారు చెట్టును ఢీకొట్టింది. ఆదివారం ( నవంబర్ 10, 2024 ) ఉదయం చోటు చేసుకున్న ఈ ఘటనలో ఇద్దరు అక్కడిక్కడే మృతి చెందగా... కారులో ప్రయాణిస్తున్న ఐదుగురికి తీవ్ర గాయాలయ్యాయి.
హైదరాబాద్ నుంచి కడ్తాల్ వైపు వెళ్తుండగా ఈ ప్రమాదం చోటు చేసుకుంది. సమాచారం అందుకున్న పోలీసులు ఘటనాస్థలికి చేరుకొని క్షతగాత్రులను హుటాహుటిన మహేశ్వరం ప్రభుత్వ ఆసుపత్రికి తరలించారు.
క్షతగాత్రులను పరిశీలించిన డాక్టర్లు ఇద్దరు అప్పటికే మరణించినట్టుగా నిర్ధారించారు. మృతి చెందిన ఇద్దరు పహాడి షరీఫ్ వాస్తవ్యులుగా గుర్తించారు పోలీసులు. మృతదేహాలను ఉస్మానియా మార్చరికి తరలించారు.
