- పాలమూరు జిల్లా భూరెడ్డిపల్లి పరిధిలో ఫైటింగ్
- ఇద్దరికి గాయాలు, సోషల్ మీడియాలో వీడియో వైరల్
జడ్చర్ల టౌన్, వెలుగు : మహబూబ్నగర్ జిల్లా జడ్చర్ల మండలంలో భూ వివాదంతో రెండు వర్గాల మధ్య గొడవ జరగ్గా..కర్రలతో కొట్టుకున్నారు. భూరెడ్డిపల్లి పరిధిలోని నేషనల్ హైవే పక్కన ఉన్న ఓ వ్యవసాయ భూమిలో 23 గుంటల భూమిని మహబూబ్నగర్కు చెందిన కొందరు కొనుగోలు చేశారు. బుధవారం హద్దురాళ్లు ఏర్పాటు చేసుకుంటుండగా, వారు కొన్న స్థలంలో కాకుండా తమ భూమిలోంచి పాతుతున్నారని గ్రామానికి చెందిన వారు అడ్డుకునే ప్రయత్నం చేశారు. ఈ సందర్భంగా రెండు వర్గాల మధ్య వాగ్వాదం జరిగింది.
ఇది ముదరడంతో ఒకరిపై ఒకరు కర్రలతో దాడులు చేసుకున్నారు. కొంతమంది పోలీసులకు ఫోన్ చేసి చెప్పగా వారు వచ్చి ఇరు వర్గాలను చెదరగొట్టారు. దాడిలో మాజీ సర్పంచ్ సత్తయ్య, చింటుతో పాటు మరికొందరు గాయపడగా దవాఖానకు తరలించారు. జడ్చర్ల టౌన్ ఎస్సె చంద్రమోహన్ రావు మాట్లాడుతూ ఫిర్యాదు వచ్చిందని, పరిశీలించి కేసు నమోదు చేసి చర్యలు తీసుకుంటామని చెప్పారు. కాగా, ఈ దాడులకు సంబంధించిన వీడియో సోషల్ మీడియాలో వైరలైంది.
