- మెదక్ జిల్లా నర్సాపూర్లో ఘటన
నర్సాపూర్, వెలుగు: మెదక్ జిల్లా నర్సాపూర్ పట్టణ సమీపంలోని రాయారావు చెరువు కాలువలో బైక్ అదుపు తప్పి పడిపోవడంతో ఇద్దరు వ్యక్తులు చనిపోయారు. సీఐ జాన్ రెడ్డి, ఎస్ఐ లింగం తెలిపిన వివరాల ప్రకారం.. నర్సాపూర్ మండలం కాగజ్ మద్దూర్ గ్రామానికి చెందిన రాములు(43), నర్సింహులు(38) వ్యవసాయం చేస్తూ జీవిస్తున్నారు. మంగళవారం నర్సాపూర్ లో పని ముగించుకొని రాత్రి సమయంలో ఇంటికి తిరిగి వస్తుండగా, రాయారావు చెరువు కాలువ వద్దకు రాగానే బైక్ అదుపు తప్పి కాలువలో పడింది. ఈ ప్రమాదంలో ఇద్దరు అక్కడికక్కడే చనిపోయారు
. బుధవారం ఉదయం స్థానికులు గమనించి పోలీసులకు సమాచారం అందించారు. విషయం తెలుసుకున్న మృతుల కుటుంబసభ్యులు, గ్రామస్తులు పెద్ద సంఖ్యలో ఘటనా స్థలానికి చేరుకున్నారు. రాములుకు భార్య, ఇద్దరు కూతుళ్లు, ఓ కొడుకు ఉండగా, నర్సింహులుకు భార్య, ముగ్గురు కొడుకులు ఉన్నారు. ఈ మేరకు కేసు నమోదు చేసి దర్యాప్తు చేస్తున్నట్లు పోలీసులు తెలిపారు.
