కల్యాణలక్ష్మి చెక్కుల పంపిణీలో పాల్గొ న్న సర్పంచ్, ఇన్ చార్జి సర్పంచ్ భర్తలు
జగిత్యాల, వెలుగు: కల్యాణలక్ష్మి చెక్కులు పంపిణీ చేయాలంటూ అధికారులు సర్పంచ్ను పిలిచారు. కానీ వేదికపైకి ఇద్దరు వ్యక్తులు ఎక్కారు. ఇద్దరిలో ఎవరూ సర్పంచ్ కాదు. కానీ కలిసి చెక్కులు పంపిణీ చేశారు. ఈ ఘటన జగిత్యాల జిల్లాలో గురువారం చోటుచేసుకుంది. జగిత్యాల రూరల్ మండలం నర్సింగాపూర్ గ్రామ సర్పంచ్సరోజ రెండు నెలల కిందట ఫారిన్ వెళ్లడంతో ఆమె బాధ్యతలు ఉప సర్పంచ్ బెజ్జంకి కాంతమ్మకు అప్పగించారు. అప్పటి నుంచి ఇన్చార్జి సర్పంచ్గా కాంతమ్మ బాధ్యతలు నిర్వహిస్తోంది. నర్సింగాపూర్, వంజరిపల్లె, టీఆర్ నగర్ కు చెందిన 13 మంది లబ్ధిదారులకు గురువారం జగిత్యాలలోని ఓ ఫంక్షన్ హాల్ లో చెక్కులు పంపిణీ చేశారు. కార్యక్రమంలో నర్సింగాపూర్ గ్రామ సర్పంచ్ను స్టేజీ మీదకు వచ్చి లబ్ధిదారులకు చెక్కులు అందించాల్సిందిగా అధికారులు కోరారు. వెంటనే సర్పంచ్ భర్త మల్లారెడ్డి, ఇన్చార్జి సర్పంచ్ భర్త చంద్రయ్య వేదికపైకి ఎక్కారు. సర్పంచ్ హోదా కలిగిన ఇద్దరికి బదులు ఎలాంటి అధికారం లేని వారి హస్బెండ్స్ రావడంతో ఏం చేయాలో అర్థంకాక అధికారులు కంగారు పడ్డారు. ఎలాగోలా కార్యక్రమం ముగిద్దామని ఆ ఇద్దరితోనే చెక్కులను ఇప్పించారు.
For More News..
