ఓవర్ స్పీడ్​ ప్రాణం తీసింది

• కరెంట్​ పోల్​ను కారు ఢీకొట్టడంతో బీటెక్ విద్యార్థి మృతి
• మరో ఐదుగురికి తీవ్ర గాయాలు
• అందరూ ఎంజీఐటీ విద్యార్థులే

గండిపేట, వెలుగు: ఓవర్ స్పీడ్​తో కారు అదుపుతప్పి కరెంట్​పోల్​ను ఢీకొట్టడంతో బీటెక్ విద్యార్థి మృతి చెందాడు. మరో ఐదుగురు తీవ్రంగా గాయపడ్డారు. గండిపేటలోని ఎంజీఐటీ కాలేజీలో శ్రీకార్, హేమసాయి, వివేక్, సృజన్, కార్తికేయ, హర్ష బీటెక్ ఫస్టియర్ చదువుతున్నాడు. వీరు ఆరుగురు మంగళవారం స్విఫ్ట్​కారులో కాలేజీ నుంచి హైదరాబాద్ కు బయలుదేరారు. మార్గమధ్యలో రాజపుష్ప కన్‌‌స్ట్రక్షన్స్​లోని ప్లాట్‌‌ 01 సమీపంలో నియో పోలీస్‌‌ రోడ్డు వద్ద కరెంట్​పోల్​ను బలంగా ఢీకొట్టారు. ఈ ప్రమాదంలో కారు నడిపిస్తున్న శ్రీకార్‌‌ అక్కడికక్కడే మృతి చెందగా, మిగిలిన ఐదుగురు తీవ్రంగా గాయపడ్డారు. వీరిని పోలీసులు సమీప ఆసుపత్రికి తరలించారు. ఈ ఘటనపై నార్సింగి పోలీసులు దర్యాప్తు చేస్తున్నారు. 

లారీ చక్రాల కిందపడి మరొకరు..

గండిపేట: ఆరాంఘర్‌‌ చౌరస్తా ప్రాంతంలో ఓ లారీ రివర్స్‌‌ తీస్తుండగా, చక్రాల కింద పడి ఓ గుర్తు తెలియని వ్యక్తి మృతి చెందాడు. స్థానికుల సమాచారంతో పోలీసులు ఘటనా స్థలాన్ని పరిశీలించారు. మృతదేహాన్ని పోస్టుమార్టం కోసం ఉస్మానియాకు తరలించారు.  

చాయ్ తాగడానికి వెళ్తూ వృద్ధుడు..

శామీర్ పేట: చాయ్ తాగడానికి వెళ్లిన వృద్ధుడు రోడ్డు ప్రమాదంలో మృతి చెందాడు. శామీర్ పేట మండలం తుర్కపల్లికి చెందిన బుస బాలయ్య (60) మంగళవారం చాయ్ తాగేందుకు రోడ్డు దాటుతున్నాడు. ఈ క్రమంలో హైదరాబాద్ నుంచి సిద్దిపేట వైపు వెళ్తున్న బైక్ అతడిని ఢీకొనంతో మృతి చెందాడు. ప్రమాదానికి కారణమైన యువకుడికి సైతం గాయాలు కాగా, సమీప ఆసుపత్రికి తరలించారు.