- డివైడర్ను బైక్ ఢీకొని మృతి
- గచ్చిబౌలిలో ఘటన
గచ్చిబౌలి, వెలుగు: అతివేగం కారణంగా ఇద్దరు సాఫ్ట్వేర్ ఉద్యోగులు ప్రాణాలు కోల్పోయారు. ఏపీలోని కాకినాడకు చెందిన కేసాని వెంకన్నస్వామి (30) హైదరాబాద్లోని అమెజాన్లో సాఫ్ట్వేర్ ఉద్యోగిగా పనిచేస్తున్నాడు. అలాగే, వైజాగ్ కు చెందిన కుమార్స్వామి (25) కూడా మైక్రోసాఫ్ట్లో సాఫ్ట్వేర్ ఉద్యోగిగా పనిచేస్తున్నాడు. వీరిద్దరూ నానక్ రాంగూడలోని వర్కింగ్ హాస్టల్లో నివాసం ఉంటున్నారు. కొద్ది రోజులకు ఇద్దరూ ఫ్రెండ్స్ అయ్యారు.
గురువారం రాత్రి ఇద్దరూ సెకండ్ షో సినిమాకు వెళ్లారు. రాత్రి 2 గంటల ప్రాంతంలో సినిమా వదిలిపెట్టిన తరువాత గచ్చిబౌలి నుంచి బైక్ మీద తమ హాస్టల్కు బయలుదేరారు. ఓవర్స్పీడ్తో డ్రైవ్ చేయడంతో వారి బైక్ గచ్చిబౌలి ఐఐఐటీ చౌరస్తా వద్ద అదుపుతప్పి డివైడర్ ను ఢీకొట్టింది. ఈ ప్రమాదంలో ఇద్దరూ బైక్ మీద నుంచి ఎగిరి కిందపడడంతో తీవ్ర గాయాలయ్యాయి. సమాచారం అందుకున్న పోలీసులు ఘటనా స్థలానికి చేరుకొని బాధితులను కొండాపూర్ జిల్లా ఆసుపత్రికి తరలించారు. అప్పటికే ఇద్దరూ మృతి చెందినట్లు డాక్టర్లు ధ్రువీకరించారు.
