యాదాద్రి, వెలుగు : పదో తరగతి చదువుతున్న ఇద్దరు హాస్టల్ స్టూడెంట్స్ శనివారం రాత్రి ఆత్మహత్యకు పాల్పడ్డారు. యాదాద్రి జిల్లా భువనగిరిలో ఈ ఘటన జరిగింది. హాస్టల్ వార్డెన్ శైలజ తెలిసిన వివరాల ప్రకారం.. సికింద్రాబాద్కు చెందిన కె.భవ్య, జి.వైష్ణవి.. భువనగిరి బీచ్ మహల్ గవర్నమెంట్ స్కూల్లో టెన్త్ క్లాస్ చదువుతున్నారు. ఇద్దరూ భువనగిరిలోని ఎస్సీ బాలికల హాస్టల్లో ఉంటున్నారు. శనివారం మధ్యాహ్నం ఏడో తరగతి స్టూడెంట్లతో భవ్య అసభ్యకరంగా మాట్లాడిందని హాస్టల్ వార్డెన్కు సమాచారం అందింది. దీంతో భవ్య, ఆమె ఫ్రెండ్ వైష్ణవిని హాస్టల్కు తీసుకొచ్చారు.
ఇద్దరికి నచ్చజెప్పిన అనంతరం అందరూ రాత్రి భోజనం చేశారు. ఆ ఇద్దరు మాత్రం ముభావంగా ఉండి భోజనం చేయకుండా గదిలోకి వెళ్లిపోయారు. రాత్రి గదిలోని ఫ్యాన్ కు చున్నీలతో ఉరివేసుకొని ఆత్మహత్యకు పాల్పడ్డారు. గమనించిన తోటి స్టూడెంట్లు హాస్టల్ సిబ్బందికి, పోలీసులకు సమాచారం అందించారు. హుటాహుటిన పోలీసులు అక్కడికి చేరుకొని భువనగిరి ప్రభుత్వాసుపత్రికి తరలించారు. అప్పటికే వారిద్దరు చనిపోయారని డాక్టర్లు నిర్ధారించారు. హాస్టల్ స్టాఫ్ను పోలీసులు ప్రశ్నించగా మధ్యాహ్నం స్కూల్ లో గొడవ జరిగిందని చెప్పారు. పోలీసులు కేసు దర్యాప్తు చేస్తున్నారు.
