పర్వతగిరి, వెలుగు : వరంగల్ జిల్లా పర్వతగిరి మండలం అన్నారం షరీఫ్ లో యాట (మేక, గొర్రె) తలకాయ కోసం రెండు గ్రామాలకు చెందిన వ్యక్తులు గొడవ పెట్టుకుని ఒకరిపై ఒకరు దాడులు చేసుకున్నారు. ఈ దాడిలో ఒకరికి తీవ్ర గాయాలు కాగా, మరికొందరు స్వల్పంగా గాయపడ్డారు. ఇది ఆలస్యంగా వెలుగులోకి వచ్చింది. సెప్టెంబర్1వ తేదీన మేక తలకాయలు కొనేందుకు కల్లెడకు చెందిన కొందరు, పెద్దతండాకు చెందిన మరికొందరు అన్నారం దర్గా దగ్గరకు వచ్చారు. కందూరు చేసేవాళ్లు దేవుడికి మొక్కు అప్పజెప్పేందుకు ఓ మేక తలకాయను తెచ్చారు.
దీని కోసం రెండు ఊళ్లకు చెందిన వ్యక్తులు తమకు కావాలంటే తమకు కావాలంటూ పోటీపడ్డారు. ఒకరినొకరు గల్లాలు పట్టుకున్నారు. ఈ క్రమంలో కల్లెడకు చెందిన ఓ వ్యక్తి అక్కడే ఉన్న కత్తి తీసుకుని తండాకు చెందిన వ్యక్తులపై దాడికి ప్రయత్నించాడు. కల్లెడకు చెందిన మరో వ్యక్తి కత్తిని పట్టుకున్న వ్యక్తిని ఆపేందుకు చూడగా ఆ కత్తి అతడి చెయ్యికి తాకి గాయమైంది. అక్కడే ఉన్న తండాకు చెందిన సంతోష్ ఆపేందుకు ప్రయత్నించగా అతడిని కొట్టడంతో తీవ్రంగా గాయపడ్డాడు. ఘటనపై ఇరు వర్గాలు పర్వతగిరి పీఎస్లో ఫిర్యాదు చేశాయి. దర్యాప్తు చేస్తున్నామని ఎస్సై వీరభద్ర రావు తెలిపారు.
