- అసమ్మతి బెడద లేకుండా కాంగ్రెస్ సెకండ్ లిస్ట్
- పక్కా వ్యూహంతో ముందుకు సాగుతున్న హైకమాండ్
మహబూబ్నగర్, వెలుగు : కాంగ్రెస్ హైకమాండ్ మహబూబ్నగర్ పార్లమెంట్ పరిధిలోని అసెంబ్లీ సెగ్మెంట్లలో క్యాండిడేట్లను విడతల వారీగా ఫైనల్ చేసేందుకు సిద్ధమైనట్లు తెలిసింది. రాష్ట్రంలో మారుతున్న రాజకీయ సమీకరణల నేపథ్యంలో క్యాండిడేట్లను ఫైనల్ చేసే విషయంలో ఆచితూచి అడుగులు వేస్తోంది. లీడర్ల మధ్య అసమ్మతి లేకుండా చూసి అభ్యర్థులను ప్రకటించాలనే ఆలోచన చేస్తున్నట్లు తెలిసింది.
ఫస్ట్ లిస్ట్లో పాలమూరు పార్లమెంట్ పరిధిలో రెండు స్థానాలు ప్రకటించగా, ఆ రెండు వికారాబాద్, రంగారెడ్డి జిల్లాల్లో ఉన్నాయి. అయితే, మహబూబ్నగర్, నారాయణపేట జిల్లాల్లో ఒక్క క్యాండిడేట్ను కూడా ఫైనల్ చేయలేదు. దీంతో ఈ రెండు జిల్లాల్లో టికెట్ల కోసం పోటీ పడుతున్న ఆశావహుల్లో ఫైనల్గా ఎవరి పేర్లు బయటకు వస్తాయనే దానిపై టెన్షన్ నెలకొంది.
అసమ్మతి లేకుండా చూడాలని..
మహబూబ్నగర్ పార్లమెంట్ పరిధిలో టికెట్లు ఆశిస్తున్న వారు ఎక్కువగా ఉన్నారు. ఒక్కో సెగ్మెంట్లో ముగ్గురు నుంచి ఐదారుగురు పోటీ పడుతున్నారు. ఒక్క మక్తల్ అసెంబ్లీలోనే ఆరుగురు టికెట్లు ఆశిస్తుండగా, దేవరకద్రలో ముగ్గురు, పాలమూరులో నలుగురు పోటీ పడుతున్నారు. దీంతో ఎవరి పేర్లు కన్ఫాం చేసినా అసమ్మతి రగిలే అవకాశం ఉండడంతో హైకమాండ్ ఫస్ట్ లిస్టులో ఈ పార్లమెంట్ పరిధిలో క్యాండిడేట్ల పేర్లను ప్రకటించలేదని తెలిసింది. అసమ్మతి నెలకొంటే కొందరు రెబల్స్గా పోటీకి దిగే చాన్స్ ఉండొచ్చనే ముందస్తు సమాచారంతో హైకమాండ్ ఈ నిర్ణయం తీసుకున్నట్లు సమాచారం.
దీనికితోడు టికెట్లు రాని ఆశావహులు పక్క పార్టీలకు వెళ్లే చాన్స్ ఉండడం, గత ఎన్నికల్లో కొన్ని సెగ్మెంట్లలో జరిగిన మాదిరిగానే ఆశావహులు కాంగ్రెస్లోనే ఉంటూ పక్క పార్టీల క్యాండిడేట్లకు సహకరించేలా ఒప్పందాలు జరిగే అవకాశాలు ఉన్నాయనే సర్వే రిపోర్టులు రావడంతో హైకమాండ్ ప్లాన్ ప్రకారం విడతల వారీగా మహబూబ్నగర్ పార్లమెంట్ పరిధిలో క్యాండిడేట్లను ప్రకటించేందుకు నిర్ణయించినట్లు తెలిసింది.
మహిళా క్యాండిడేట్కూ అవకాశం..
కాంగ్రెస్ రిలీజ్ చేసిన ఫస్ట్ లిస్ట్లో నాగర్కర్నూల్ పార్లమెంట్ పరిధిలోని గద్వాల అసెంబ్లీ స్థానం నుంచి సరిత తిరుపతయ్యను బరిలోకి దింపారు. పాలమూరు పార్లమెంట్లో కూడా ఒక మహిళకు టికెట్ ఇచ్చే అవకాశాలున్నాయి. మక్తల్ నుంచి ఇప్పటికే సీతా దయాకర్రెడ్డితో పాటు దివంగత మాజీ ఎమ్మెల్యే చిట్టెం నర్సిరెడ్డి మనుమరాలు చిట్టెం పర్ణికారెడ్డి టికెట్లు ఆశిస్తున్నారు. వీరిద్దరిలో ఒకరికి టికెట్ ఇచ్చే విషయంపై పార్టీ హైకమాండ్ ఆలోచన చేస్తోంది.
ఇటీవల హైకమాండ్ రెండు పక్క పక్క నియోజకవర్గాల్లో వీరిద్దరిపై సర్వే నిర్వహించగా.. ఆ రిపోర్ట్ ఇద్దరికీ అనుకూలంగా వస్తే ఇద్దరికీ టికెట్లు ఇచ్చే చాన్స్ కూడా ఉన్నట్లు సమాచారం. పక్క పక్క నియోజకవర్గాల్లోనే పోటీ చేసే అవకాశం ఉండడంతో ఇద్దరికీ ప్లస్ అవుతుందనే చర్చ నడుస్తోంది.
మరో ఇద్దరు బీసీలకూ చాన్స్..
మహబూబ్నగర్ పార్లమెంట్ పరిధిలో అత్యధికంగా బీసీ జనాభా ఉంది. ఇటీవల ఈసీ ప్రకటించిన ఓటర్ల లిస్ట్ ఆధారంగా ఈ పార్లమెంట్లోని ఏడు అసెంబ్లీ స్థానాల్లో 16,06,745 మంది ఓటర్లు ఉండగా, ఇందులో 53 శాతం అంటే ఎనిమిదిన్నర లక్షల మంది ఓటర్లు బీసీలే ఉండటం విశేషం. దీంతో కాంగ్రెస్ హైకమాండ్ ఈ పార్లమెంట్ పరిధిలో మరో రెండు స్థానాలను బీసీలకు కేటాయించాలనే ఆలోచన చేస్తున్నట్లు తెలిసింది. నారాయణపేట, మక్తల్, దేవరకద్ర, మహబూబ్నగర్లో బీసీ ఓటర్లు ఎక్కువగా ఉండగా, ఈ నాలుగింటిలో రెండు స్థానాల నుంచి బీసీ లీడర్లను బరిలో దింపడంపై దృష్టి పెట్టినట్లు పార్టీలో చర్చ నడుస్తోంది.
