భైంసా, వెలుగు: నిర్మల్ జిల్లా బాసర ట్రిపుల్ఐటీలో వరుసగా ఫుడ్ పాయిజనింగ్ ఘటనలు చోటు చేసుకున్నా మెస్ కాంట్రాక్టర్ల తీరు మారడంలేదు. వర్సిటీలోని కేంద్రీయ బండార్ మెస్ కిచెన్లో ఇద్దరు వర్కర్లు స్నానాలు చేస్తున్న ఓ వీడియో శుక్రవారం సోషల్ మీడియాలో వైరలయ్యింది. ఇది ఎప్పుడు జరిగిందో తెలియకున్నా..కిచెన్లో వర్కర్లు స్నానాలు చేయడం, మురికి నీరు భోజనంపై పడడంపట్ల స్టూడెంట్లు ఆందోళన వ్యక్తం చేస్తున్నారు. విద్యార్థులు ఆందోళనలతో ఆధికారులు దిగివస్తున్నా.. కాంట్రాక్టర్లు, అక్కడ పని చేస్తున్న సిబ్బంది మాత్రం ఇష్టారాజ్యంగా వ్యవహరిస్తున్నారు. కేంద్రీయ బండార్ సంస్థ నిర్వహిస్తున్న మెస్లో చాలా రోజుల నుంచి వర్కర్లు వంటలు చేసే చోటుకు దగ్గర్లోనే స్నానాలు చేస్తున్నారని స్టూడెంట్లు అంటున్నారు. స్నానాలు చేయడంవల్ల మురికి నీరు, సబ్బు నీరు వంటల్లో పడుతోందని, అందువల్లే ఫుడ్ పాయిజన్ అయ్యిందని భావిస్తున్నారు.
వర్కర్లు పరిశుభ్రత పాటించరని, వంట పాత్రలు కూడా సరిగా కడగడం లేదని చెప్తున్నారు. స్నానాల వీడియో బయటకు రావడంతో విద్యార్థులు, వారి తల్లిదండ్రులు మరో సారి ఆందోళనకు గురయ్యారు. మెస్ నిర్వాహకులపై కఠిన చర్యలు తీసుకోవాలని డిమాండ్ చేస్తున్నారు. కాగా.. ట్రిపుల్ఐటీలో మెస్ కాంట్రాక్టు పొందిన కేంద్రీయ బండార్ సంస్థకు ఎలాంటి అనుమతి, గుర్తింపూ లేదని, రాజకీయ పలుకుబడితోనే ఈ సంస్థ తనకు మెస్ నిర్వహణలో అనుభవం ఉన్నట్లు తప్పుడు పత్రాలు సృష్టించి కాంట్రాక్టు పొందిందన్న ఫిర్యాదులు ఉన్నాయి. కాగా, ఈ వీడియో లాక్డౌన్ టైమ్నాటిదని, అప్పట్లో వంట పాత్రలు కడిగిన తర్వాత వర్కర్లు స్నానాలు చేశారని ఆఫీసర్లు చెబుతున్నారు.
