దేశవ్యాప్తంగా వ్యాధి నిరోధక టీకాల పంపిణీని పూర్తిస్థాయిలో డిజిటలైజేషన్ చేయడానికి యూ–విన్ పోర్టల్ యాప్ను కేంద్ర ప్రభుత్వం ఆగస్టు నాటికి అందుబాటులోకి తీసుకురానున్నది. పైలెట్ ప్రాజెక్టులో భాగంగా 2024, జులై 9 వరకు 5.33 కోట్ల మంది గ్రహీతల వివరాలను యు–విన్లో కేంద్ర ప్రభుత్వం పొందుపరచనున్నది.
ప్రతి గర్భిణి, అయిదేండ్ల లోపు పిల్లలకు వేసే ప్రతి టీకా వివరాలు యూ విన్ పోర్టల్ ద్వారా డిజిటలైజ్ చేస్తారు. దీంతో వాక్సినేషన్ షెడ్యూల్ ప్రకారం వ్యాక్సిన్ ఇచ్చేందుకు కుటుంబ సభ్యులకు ఈ పోర్టల్ ద్వారా ముందుగానే సమాచారం అందుతుంది. బాధితులు వ్యాక్సిన్ వేసుకునే సమయాన్ని మర్చిపోయినా సరే పోర్టల్ ద్వారా అందించిన సమాచారంతో సరైన సమయంలో తీసుకోవచ్చు.
డిజిటలైజేషన్ ద్వారా దేశం లేదా రాష్ట్రంలో ఎక్కడైనా సమీపంలోని ఆరోగ్య కేంద్రంలో టీకాలు వేయవచ్చు. వ్యాక్సిన్ తీసుకున్న తర్వాత ఈ పోర్టల్ ద్వారా సర్టిఫికెట్ను కూడా డౌన్లోడ్ చేసుకోవచ్చు. టీకా వేయించుకునే సమయాన్ని కూడా షెడ్యూల్ చేసుకోవచ్చు.
క్యూఆర్ కోడ్ ఆధారంగా పనిచేసే ఈ పోర్టల్లో ఈ–టీకా ధ్రువీకరణ పత్రాన్ని దేశ పౌరులు ఎవరైనా పొందవచ్చు. కొవిడ్ వ్యాక్సినేషన్ పోర్టల్ కో–విన్ మాదిరిగానే పనిచేసే ఈ పోర్టల్ను పశ్చిమబెంగాల్ మినహా మిగతా రాష్ట్రాలు, కేంద్ర పాలిత ప్రాంతాల్లో ఇప్పటికే పైలట్ ప్రాజెక్టుగా కేంద్ర ప్రభుత్వం అమలు చేస్తున్నది.
రియల్ టైమ్లో పనిచేసే ఈ పోర్టల్/ యూ విన్ యాప్ను అండ్రాయిడ్ ఫోన్లో డౌన్లోడ్ చేసుకుని బాధితులు కోరుకున్న టీకా కేంద్రాల్లో టీకాలు పొందడానికి పౌరులు స్వీయ రిజిస్ట్రేషన్ చేసుకోవచ్చు.
