న్యూఢిల్లీ: అండర్ వరల్డ్ డాన్ చోటారాజన్ అస్వస్థతకు గురి అయ్యాడు. ప్రస్తుతం తీహార్ జైలులో ఖైదీగా ఉన్న రాజన్ శుక్రవారం (జనవరి 10) అనారోగ్యానికి గురి కావడంతో జైలు అధికారులు ఢిల్లీ ఎయిమ్స్కు తరలించారు. చోటా రాజన్‌కు ఏమైంది..? ప్రస్తుతం అతడి ఆరోగ్య పరిస్థితి ఎలా ఉందన్న దానిపై ఎయిమ్స్ వైద్యులు హెల్త్ బులెటిన్ విడుదల చేస్తే గానీ రాజన్ హెల్త్ కండిషన్ ఎలా ఉందన్న వివరాలు తెలియదు.
రాజన్ అసలు పేరు రాజేంద్ర సదాశివ్ నికల్జే. అండర్‌వరల్డ్ డాన్ దావూద్ ఇబ్రహీం రైట్ హ్యాండ్గా పేరు గాంచిన చోటా రాజన్ పలు కేసుల్లో దోషిగా తేలడంతో ప్రస్తుతం తీహార్ జైలులో శిక్ష అనుభవిస్తున్నాడు. దావుద్ ఇబ్రహీం అండతో కొన్నేళ్ల పాటు ముంబై మాఫియాను నడిపించాడు రాజన్. సెంట్రల్ ముంబైలోని గామ్‌దేవి వద్ద గోల్డెన్ క్రౌన్ హోటల్ యజమాని జయశెట్టిని 2001, మే 4న అతడి హోటల్లోనే దారుణంగా కాల్చి చంపారు చోటా రాజన్ మనుషులు.
Also Read :- H1B వీసా అందిస్తున్న టాప్ 10 ఇండియన్ కంపెనీలు ఇవే..
హోటల్ వ్యాపారి జయశెట్టి మర్డర్ అప్పట్లో ముంబైలో సంచలనం సృష్టించగా.. ఈ కేసులో నేరం రుజువు కావడంతో ముంబైలోని ప్రత్యేక న్యాయస్థానం గ్యాంగ్‌స్టర్ ఛోటా రాజన్‌కు యావజ్జీవ కారాగార శిక్ష విధించింది. అలాగే, సీనియర్ క్రైమ్ జర్నలిస్ట్ జే డే హత్య కేసులోనూ 2018లో ముంబైలోని ప్రత్యేక కోర్టు రాజన్‌కు జీవిత ఖైదు విధించింది. ఈ కేసులతో పాటు మరికొన్ని కేసుల్లో చోటా రాజన్ దోషిగా నిర్ధారణ కావడంతో తీహార్ జైల్లో శిక్ష అనుభవిస్తున్నాడు.
