న్యూఢిల్లీ: ఉత్తరాఖండ్లోని సోన్ ప్రయాగ్ – కేదార్ నాథ్, గోవింద్ఘాట్ – హేమకుండ్ రోప్ వే ప్రాజెక్టులకు కేంద్ర కేబినెట్ ఆమోదం తెలిపింది. ఈ ప్రాజెక్ట్ కోసం రూ.6,811 కోట్లు ఖర్చు చేయనున్నది. రోప్ వే ప్రాజెక్టులు కంప్లీట్ అయితే.. చార్ధామ్ యాత్రకు వెళ్లే భక్తులు ట్రెక్కింగ్ చేయాల్సిన అవసరం ఉండదు. పర్యాటకరంగ అభివృద్ధికి కూడా ఈ ప్రాజెక్టు ఎంతో దోహదపడుతుందని ప్రభుత్వం తెలిపింది.
ప్రధానమంత్రి నరేంద్ర మోదీ అధ్యక్షతన మంత్రివర్గం బుధవారం భేటీ అయింది. ఈమేరకు కొన్ని కీలక ప్రాజెక్టులకు కేబినెట్ ఆమోదం తెలిపింది. ఈ వివరాలను కేంద్రమంత్రి అశ్వినీ వైష్ణవ్ మీడియాకు వెల్లడించారు. ‘‘సోన్ ప్రయాగ్ – కేదార్ నాథ్, గోవింద్ఘాట్ – హేమకుండ్ రోప్ వే ప్రాజెక్టులను రానున్న 4 నుంచి 6 ఏండ్లలో పూర్తి చేయాలని లక్ష్యంగా పెట్టుకున్నాం. నేషనల్ రోప్ వేస్ డెవలప్మెంట్ ప్రోగ్రామ్ – పర్వతమాల పరియోజన కింద వీటిని నిర్మిస్తున్నాం. సోన్ ప్రయాగ్ – కేదార్నాథ్ రోప్ వే మధ్య దూరం 12.9 కిలో మీటర్లు ఉంది.
రోప్ వే ప్రాజెక్ట్ను పబ్లిక్ ప్రైవేట్ పార్టనర్షిప్ (పీపీపీ) పద్ధతిలో నిర్మిస్తాం. దీని కోసం రూ.4,081 కోట్లు ఖర్చు చేస్తున్నాం. అత్యంత అధునాతన ట్రై -కేబుల్ డిటాచబుల్ గొండోలా (3ఎస్) టెక్నాలజీతో ఏర్పాటు చేస్తున్నాం. ఒక డైరెక్షన్లో ఒకేసారి 1,800 మందిని తీసుకెళ్లే సామర్థ్యంతో ఈ ప్రాజెక్టు నిర్మాణం ఉంటుంది. రోజుకు సుమారు 18వేల మంది యాత్రికులు ప్రయాణించొచ్చు. 9 గంటల జర్నీ.. 36 నిమిషాల్లోనే పూర్తి చేయొచ్చు’’ అని ఆయన తెలిపారు.
రైతుల కోసం ఎల్హెచ్డీసీ ప్రోగ్రామ్
రైతుల వద్ద ఉన్న పశు సంపదను కాపాడేందుకు కీలక నిర్ణయం తీసుకున్నట్లు కేంద్ర మంత్రి అశ్వినీ వైష్ణవ్ తెలిపారు. ‘లైవ్స్టాక్స్ హెల్త్ అండ్ డిసీస్ కంట్రోల్ ప్రోగ్రామ్’(ఎల్హెచ్డీసీపీ) కు రూ.3,880 కోట్లు కేటాయించినట్లు వివరించారు. పశువులకు మెరుగైన వైద్యంతో పాటు హై క్వాలిటీ మెడిసిన్స్ అందించేందుకు కేబినెట్ నిర్ణయించిందన్నారు. ‘‘ఎల్హెచ్డీసీపీ కింద పశువులకు వ్యాక్సిన్లు వేస్తారు. పశు ఔషధి కేంద్రాలు ఏర్పాటు చేసేందుకు నిర్ణయించాం. ఈ ప్రోగ్రామ్ కోసం కేటాయించిన మొత్తం బడ్జెట్ నుంచి రూ.75 కోట్లను క్వాలిటీ మెడిసిన్స్ కోసం అందజేస్తాం’’అని ఆయన తెలిపారు.
