ఛత్రపతి శంభాజీనగర్ (ఔరంగాబాద్): ఐదారు నెలల్లో మహిళలకు క్యాన్సర్ టీకా అందుబాటులోకి వస్తుందని కేంద్ర ఆరోగ్య శాఖ సహాయ మంత్రి ప్రతాప్ రావ్ జాదవ్ తెలిపారు. మంగళవారం మహారాష్ట్రలోని ఛత్రపతి శంభాజీనగర్లో మీడియాతో ఆయన మాట్లాడారు. ‘‘మహిళలను తీవ్రంగా వేధిస్తున్న క్యాన్సర్ను ఎదుర్కొనే వ్యాక్సిన్ తయారీపై పరిశోధనలు దాదాపు పూర్తికావొచ్చాయి. ట్రయల్స్ కొనసాగుతున్నాయి. ఐదారు నెలల్లో టీకా అందుబాటులోకి వస్తుంది. దీన్ని 9 ఏండ్ల నుంచి 16 ఏండ్లున్న బాలికలకు ఇస్తాం. ఇది రొమ్ము, నోటి, గర్భాశయ క్యాన్సర్లను నియంత్రిస్తుంది” అని ప్రతాప్ రావ్ జాదవ్ వెల్లడించారు.
‘‘మన దేశంలో క్యాన్సర్ పేషెంట్ల సంఖ్య పెరుగుతున్నది. ఈ వ్యాధిని నివారించేందుకు కేంద్ర ప్రభుత్వం చర్యలు తీసుకుంటున్నది. 30 ఏండ్లు పైబడిన మహిళలకు ఆస్పత్రుల్లో స్ర్కీనింగ్ నిర్వహించడంతో పాటు ఈ వ్యాధిని ముందుగానే గుర్తించేందుకు డేకేర్ క్యాన్సర్ సెంటర్లను ఏర్పాటు చేస్తున్నది” అని తెలిపారు. క్యాన్సర్ ట్రీట్ మెంట్లో వినియోగించే మెడిసిన్స్పై కస్టమ్స్ డ్యూటీని ఇప్పటికే మినహాయించినట్టు చెప్పారు. కాగా, హెల్త్ కేర్ సెంటర్లను ఆయుష్ ఫెసిలిటీస్గా మార్చడంపై మీడియా ప్రశ్నించగా.. ‘‘ఆస్పత్రుల్లో ఆయుష్ డిపార్ట్ మెంట్లు ఉన్నాయి. ప్రజలు అక్కడ సేవలు పొందొచ్చు. ఇప్పుడు దేశవ్యాప్తంగా 12,500 ఫెసిలిటీస్ ఉన్నాయి. రానున్న రోజుల్లో వాటి సంఖ్యను పెంచుతాం” అని జాదవ్ పేర్కొన్నారు.
