నాగర్ కర్నూల్, వెలుగు : బీఆర్ఎస్ నుంచి ఎన్నికల్లో పోటీ చేసే అభ్యర్థుల లిస్ట్ను ఈ నెల 21న సీఎం కేసీఆర్ ప్రకటిస్తారన్న ప్రచారం నేపథ్యంలో కల్వకుర్తి టికెట్ నిలబెట్టుకోవడానికి సిట్టింగ్ ఎమ్మెల్యే జైపాల్ యాదవ్,ఈ సారైనా టికెట్ దక్కించుకోవాలని ఎమ్మెల్సీ కసిరెడ్డి నారాయణరెడ్డి ప్రయత్నాలు ముమ్మరం చేశారు. ఈ నేపథ్యంలో తలకొండపల్లి మండల జడ్పీటీసీ, ఉప్పల చారిటబుల్ ట్రస్ట్ ఫౌండర్ ఉప్పల వెంకటేశ్ శనివారం మంత్రి కేటీఆర్ సమక్షంలోబీఆర్ఎస్లో చేరారు. ఎమ్మెల్యేను వ్యతిరేకించే ఉప్పల వెంకటేశ్ఇండిపెండెంట్గా పోటీ చేసి జడ్పీటీసీగా గెలిచారు.
ఎమ్మెల్సీ కసిరెడ్డి నారాయణరెడ్డి మనిషిగా ముద్రపడిన ఆయనజైపాల్ యాదవ్ ఓటమే లక్ష్యంగా పని చేస్తానని గతంలో, ఇటీవల ప్రకటించారు. ఎమ్మెల్సీకి టికెట్ ఇస్తే గెలిపించుకుంటామని, లేనిపక్షంలో జైపాల్యాదవ్ను ఓడిస్తామని, ఇండిపెండెంట్గా బరిలో ఉంటామని స్టేట్మెంట్లు ఇచ్చారు. ఈ నేపథ్యంలో వెంకటేశ్ను పార్టీలోకి తీసుకొచ్చే బాధ్యతను ఎమ్మెల్యేజైపాల్యాదవ్కు మంత్రి కేటీఆర్ అప్పగించారు. ఎమ్మెల్యే పిలిస్తే స్పందిస్తారా? అనే సందేహాలను పక్కకు పెట్టి పిలిచిందే ఆలస్యమన్నట్టుగా తన వర్గానికి చెందిన వారితో కలిసి శనివారం పార్టీలో చేరిపోయారు.
సోమవారం ప్రకటించే లిస్ట్లో ఎమ్మెల్యే టికెట్ ఎవరికి ప్రకటిస్తారనే ఉత్కంఠ నేపథ్యంలో ఉప్పల చేరిక విషయం నియోజకవర్గంతో పాటు జిల్లాలో ప్రస్తుతం చర్చనీయాంశంగా మారింది.
అభ్యర్థిత్వం మార్చాలని అల్టిమేటం..
కడ్తాల్, కందుకూరులో ఇటీవల ఏర్పాటు చేసిన సమావేశాల్లో ఎమ్మెల్సీ కసిరెడ్డి నారాయణ రెడ్డి, జడ్పీ వైస్చైర్మన్ బాలాజీ సింగ్, మాజీ మంత్రి చిత్తరంజన్దాస్, జడ్పీటీసీ ఉప్పల వెంకటేశ్, బృంగి ఆనంద్ కుమార్, పసుల సుదర్శన్ రెడ్డి తదితరులు ఎమ్మెల్యే జైపాల్యాదవ్ను మార్చాలని హైకమాండ్కు అల్టిమేటం ఇచ్చారు. మెజార్టీ నాయకులు, కార్యకర్తల అభిప్రాయాన్ని కాదని టికెట్ ఇస్తే ఓడిస్తామని ప్రకటించారు. పార్టీ, ఇంటలిజెన్స్ సర్వే రిపోర్టులతో అభ్యర్థి ఎంపికపై పునరాలోచనలో పడిన హైకమాండ్ క్యాండిడేట్ మార్పు ఉంటుందంటూ లీకులు ఇచ్చిందనే వార్తలు వచ్చాయి.
రంగారెడ్డి జిల్లా పరిధిలోకి వచ్చే ఆమనగల్లు, కడ్తాల్, తలకొండపల్లి, మాడ్గుల మండలాల్లో ఎమ్మెల్యే, ఎమ్మెల్సీ వర్గాలు నువ్వా నేనా అన్నట్లు పోటీ పడ్డాయి. పార్టీ, ప్రభుత్వ కార్యక్రమాలను ఎవరికి వారే నిర్వహించుకున్నారు. అఫీషియల్ ప్రోగ్రామ్స్లో తనకు సమాచారం ఇవ్వడం లేదని కసిరెడ్డి పలుమార్లు ఫైర్ అయ్యారు. ఈ నేపథ్యంలో పార్టీ అభ్యర్థిత్వాన్ని పక్కన పెట్టి నియోజకవర్గంలో ప్రభావం చూపే ఉప్పల వెంకటేశ్, గోలి శ్రీనివాస్రెడ్డి, బాలాజీ సింగ్, ఆనంద్కుమార్, పసుల సుదర్శన్రెడ్డిలను ఒకే లైన్లోకి తేవాలనే లక్ష్యంతో హైకమాండ్ పావులు కదుపుతోంది. గోలి శ్రీనివాస్రెడ్డి, ఉప్పల వెంకటేశ్ను బుజ్జగించగా, జడ్పీ వైస్చైర్మన్ బాలాజీ సింగ్కు భవిష్యత్ ఉంటుందని చెబుతూ దగ్గర చేసుకుంటున్నారు.
ఉప్పల చేరికకు పక్కా ప్లాన్..
తలకొండపల్లి మండలంలో ప్రభావం చూపించే ఉప్పల వెంకటేశ్ను పార్టీలోకి చేర్చుకునే విషయంపై ఎమ్మెల్సీ కసిరెడ్డి ఇటీవల కేటీఆర్తో చర్చించినట్లు సమాచారం. ఉప్పల చేరికకు కేటీఆర్ గ్రీన్సిగ్నల్ ఇవ్వడంతో పాటు ఆ బాధ్యతను ఎమ్మెల్యే, నియోజకవర్గ ఇన్చార్జి జైపాల్యాదవ్కు అప్పగించారు. ఎమ్మెల్యే చొరవతో ఉప్పల కేటీఆర్ సమక్షంలో పార్టీలో చేరిపోయారు. కల్వకుర్తి నుంచి టికెట్ ఆశిస్తున్న నాయకులు ఎక్కువగా ఉన్నారని కామెంట్ చేసిన కేటీఆర్, ఎవరికి టికెట్ ఇచ్చినా అందరు కలిసి గెలిపించుకోవాలని కోరారు.
