- మంత్రి శ్రీధర్ బాబుతో సంస్థ ప్రతినిధుల భేటీ
హైదరాబాద్, వెలుగు: అమెరికాకు చెందిన ప్రముఖ ఆర్ఎక్స్ బెనిఫిట్స్ అనే సంస్థ దేశంలోనే మొదటిసారిగా హైదరాబాద్లో గ్లోబల్ కేపబిలిటీ సెంటర్(జీసీసీ)ను ఏర్పాటు చేయనుంది. ఈ మేరకు బుధవారం సంస్థ ప్రతినిధులు మంత్రి శ్రీధర్ బాబుతో సెక్రటేరియెట్లో సమావేశమయ్యారు. అనంతరం మంత్రి మాట్లాడారు. ఆర్ఎక్స్ బెనిఫిట్స్ జీసీసీ ద్వారా 300 మందికి ఉపాధి దొరుకుతుందని తెలిపారు.
రాష్ట్రంలోని ప్రతిభావంతులకు మంచి అవకాశాలు వస్తాయని చెప్పారు. ఈ సంస్థ తన క్లయింట్లుగా ఉండే ఫార్మసీలు లాభాలు పెంచుకునేందుకు తోడ్పడుతుందన్నారు. హైదరాబాద్ స్కిల్ సెంటర్ ద్వారా ప్రపంచ వ్యాప్తంగా ప్రొడక్ట్ ఇంజనీరింగ్ కార్యక్రమాలను నిర్వహిస్తుందన్నారు. రాష్ట్రంలో సాంకేతిక నైపుణ్యం కలిగిన మానవ వనరుల లభ్యత అపారంగా ఉందని, అందుకే ఎంఎన్సీలకు రాష్ట్రం డెస్టినేషన్గా మారిందని పేర్కొన్నారు. వ్యాపార విస్తరణకు అనుకూల వాతావరణం ఉండటం, మౌలిక సదుపాయాల పరంగా ఎటువంటి సమస్యలు లేకపోవడంతో ఆర్ఎక్స్ బెనిఫిట్స్ సంస్థ హైదరాబాద్ను ఎంపిక చేసుకుందని వివరించారు. ఆధునిక సాంకేతిక, జనరేటివ్ ఆర్టిఫిషియల్ ఇంటెలిజెన్స్ వేగంగా విస్తరిస్తున్న నేపథ్యంలో వివిధ రంగాల్లో డిజిటల్ పరివర్తన అనివార్యంగా మారిందని చెప్పారు.
