- 1200 డాలర్లు డిమాండ్ చేసిన డ్రగ్స్ మాఫియా
- ఇవ్వకుంటే కిడ్నీ అమ్మేస్తామంటూ బెదిరింపులు
- విదేశాంగ మంత్రిత్వ శాఖకు తండ్రి సలీం లేఖ
సికింద్రాబాద్, వెలుగు : ఉన్నత చదువుల కోసం అమెరికా వెళ్లిన ఓ హైదరాబాద్ స్టూడెంట్ను అక్కడి డ్రగ్స్ మాఫియా కిడ్నాప్ చేసింది. విద్యార్థి కుటుంబ సభ్యులు తెలిపిన వివరాల ప్రకారం.. సికింద్రాబాద్లోని నాచారం ఎర్రకుంట అంబేద్కర్ నగర్లో నివాసముండే మహ్మద్ సలీం కుమారుడు మహ్మద్ అబ్దుల్ అర్ఫత్(25) నగరంలో డిగ్రీపూర్తి చేశాడు. అతడికి అమెరికాలోని క్లీవ్లాండ్ యూనివర్సిటీలో ఐటీ మాస్టర్ కోర్సులో అడ్మిషన్ లభించింది. నిరుడు మే లో అర్ఫత్ అమెరికా వెళ్లి.. ఓహియోలో ఉంటూ చదువుకుంటున్నాడు. ప్రతిరోజూ తన తండ్రితో ఫోన్లో మాట్లాడే అర్ఫత్ ఈ నెల 7 నుంచి అందుబాటులోకి రాలేదు. ఎన్నిసార్లు ఫోన్చేసినా స్విచ్ఛాఫ్ రావడంతో ఆందోళనకు గురైన సలీం.. కేంద్ర విదేశాంగ శాఖ మంత్రి జైశంకర్కు లేఖ రాశారు.
విదేశాంగ మంత్రిత్వ శాఖ ద్వారా వాషింగ్టన్లోని ఇండియన్ ఎంబసీకి, చికాగోలోని ఇండియన్ కాన్సులేట్కు సమాచారం ఇచ్చి తమ కుమారుడి ఆచూకీ రాబట్టాలని కోరారు. ఇదిలా ఉండగానే .. అమెరికా నుంచి గుర్తు తెలియని వ్యక్తులు ఫోన్ చేసి తాము డ్రగ్స్ ముఠాకు చెందిన వారమని, మీ కొడుకును కిడ్నాప్ చేశాం.. వెంటనే 1200 డాలర్లు పంపాలని.. అప్పుడే నీ కొడుకును వదిలేస్తామని సలీంను బెదిరించారు. అయితే, ఈ డబ్బులు ఎక్కడకు పంపాలి? ఎలా పంపాలనే సమాచారం మాత్రం చెప్పలేదని సలీం తెలిపారు.
డబ్బులు పంపకపోతే అర్ఫత్ కిడ్నీలు అమ్మేస్తామని బెదిరించినట్టు చెప్పారు. ఈ విషయాన్ని అమెరికాలో ఉన్న తమ బంధువులకు తెలియజేశామని, వారు క్లీవ్లాండ్ పోలీసులకు ఫిర్యాదు చేసినట్టు తెలిపారు. కేసు నమోదు చేసిన పోలీసులు దర్యాప్తు మొదలు పెట్టినట్టు సలీం తెలిపారు. కాగా, ఈ నెల 18న అర్ఫత్ కిడ్నాప్పై అమెరికాలోని తమ కుటుంబ సభ్యులు చికాగోలోని ఇండియన్ కాన్సులేట్కు ఫిర్యాదుచేసినట్టు చెప్పారు.
