బీజింగ్: గాల్లోనే కరోనాను చంపేసే ఓ బ్యాక్ ప్యాక్ (బ్యాగ్ ) లాంటి పరికరాన్ని తయారు చేశాడు చైనా ఆర్కిటెక్ట్ డయాంగ్ సన్. బ్యాట్ మ్యాన్ సినిమా స్ఫూర్తిగా, కరోనా వ్యాప్తికి కారణమైన గబ్బిలాలే ఆదర్శంగా ఆ పరికరాన్ని తయారు చేశాడు. ఈ బ్యాగు లాంటి పరికరంలో వైరస్‌ను చంపేందుకు అవసరమయ్యే టెంపరేచర్‌ను పుట్టించే యూవీ లైట్లను (అల్ట్రా వయొలెట్ ) అమర్చాడు. అవి 56 డిగ్రీల టెంపరేచర్‌ను పుట్టిస్తాయన్నాడు. గబ్బిలాలు గాల్లోకి ఎగిరేటప్పుడు వైరస్ బాడీ అంతా వ్యాపించకుండా టెంపరేచర్‌ను పెంచుకుంటాయని, దాని స్ఫూర్తిగానే ఈ యూవీ లైట్ల బ్యాగ్‌ను తయారు చేశానని డయాంగ్ సన్ చెబుతున్నాడు. వేడిని తట్టుకునే పాలీవినైల్ క్లో రైడ్ ఫిల్మ్‌తో దానిని తయారు చేసినట్టు తెలిపాడు. అయితే, ప్రపంచ ఆరోగ్య సంస్థ మాత్రం ఆ వేడికి చర్మం మండడంతో పాటు ఇరిటేషన్ వస్తుందని, అది డేంజరని పేర్కొంది.
