- ఇది వరకే మినిస్టర్ పోస్ట్ ఇస్తామని సీఎం హామీ
- జిల్లా స్థాయిలో నామినేటెడ్ పదవుల కోసం పెరిగిన పోటీ
- ముడా చైర్మన్ పోస్ట్ కు డిమాండ్
మహబూబ్నగర్, వెలుగు: ఉమ్మడి పాలమూరు జిల్లాపై సీఎం రేవంత్ రెడ్డిపై ఫుల్ ఫోకస్ పెట్టారు. ఇప్పటికే జిల్లా నుంచి ఎక్సైజ్, పర్యాటక శాఖ మంత్రిగా జూపల్లి కృష్ణారావు కొనసాగుతుండగా, త్వరలో జరిగే మంత్రివర్గ విస్తరణలో మరో ఎమ్మెల్యేకు కూడా మంత్రి వర్గంలో చోటు కల్పించేందుకు ప్రయత్నాలు జరుగుతున్నట్లు తెలిసింది. ప్రధానంగా ఉమ్మడి జిల్లాలో ముదిరాజ్ సామాజిక వర్గానికి చెందిన ఓటర్లు ఎక్కువగా ఉండడంతో ఆ సామాజిక వర్గానికి చెందిన మక్తల్ ఎమ్మెల్యే వాకిటి శ్రీహరికి మంత్రి పదవి దక్కే అవకాశాలు ఉన్నట్లు జోరుగా ప్రచారం జరుగుతోంది.
పార్లమెంట్ ఎన్నికల్లో సీఎం హామీ..
ఉమ్మడి జిల్లాలోని మహబూబ్నగర్, మక్తల్, నారాయణపేట, షాద్నగర్, జడ్చర్ల, గద్వాల, కొల్లాపూర్, వనపర్తి, నాగర్కర్నూల్ నియోజకవర్గాల్లో 20 లక్షల వరకు బీసీ సామాజిక వర్గానికి చెందిన ఓటర్లు ఉన్నారు. వీరిలో 8 లక్షలకు పైగా ముదిరాజ్ సామాజిక వర్గానికి చెందిన వారే. అయితే గత పార్లమెంట్ ఎన్నికల సందర్భంగా జిల్లాల్లో పర్యటించిన సీఎం రేవంత్రెడ్డి పాలమూరు జిల్లాకు మరో మంత్రి పదవి ఇప్పిస్తామన్నారు. ఇందులో భాగంగా మక్తల్లో జరిగిన సభలో బీసీ కోటాలో స్థానిక ఎమ్మెల్యే వాకిటి శ్రీహరికి మంత్రివర్గంలో చోటు కల్పిస్తామని హామీ ఇచ్చారు.
ఈ మేరకు ప్రయత్నాలు మొదలుపెట్టారు. నాలుగు రోజులుగా సీఎం రాష్ట్ర మంత్రివర్గ విస్తరణకు సంబంధించి ఢిల్లీలో హైకమాండ్తో చర్చలు జరుపుతున్నారు. ఆరు మంత్రి పదవులు భర్తీ చేయాల్సి ఉండగా, సీఎం నలుగురి పేర్లను ప్రతిపాదించినట్లు తెలిసింది. ఇందులో వాకిటి శ్రీహరి పేరు కూడా ఉన్నట్లు చర్చ జరుగుతోంది. సీఎంకు అత్యంత సన్నిహితుడు కావడంతో ఆయనకు మంత్రి వర్గంలో బెర్త్ కన్ఫాం అయ్యిందనే చర్చలు జోరుగా సాగుతున్నాయి. అలాగే నాలుగు రోజుల నుంచి శ్రీహరి కూడా సీఎంతో పాటే ఢిల్లీ టూర్లో ఉండడం ఇందుకు బలం చేకూరుస్తోంది.
భారీగా ఆశావహులు..
జిల్లా స్థాయి పదవులకు ఫుల్ డిమాండ్ ఏర్పడింది. ఒక్కో పోస్టుకు ముగ్గురు, నలుగురు లీడర్లు పోటీ పడుతున్నారు. ఇందుకోసం ఎమ్మెల్యేల వద్ద పైరవీలు మొదలుపెట్టారు. అయితే ముడా చైర్మన్ పోస్టు కోసం ఎక్కువ మంది పట్టుబడుతున్నారు. ఈ విషయంపై ఎమ్మెల్యేల మధ్య చర్చలు కూడా జరుగుతున్నాయి. దీని పరిధిలో మహబూబ్నగర్, జడ్చర్ల, దేవకరద్ర నియోజకవర్గాలు ఉండడంతో, ఈ మూడు నియోజకవర్గాలకు చెందిన సెకండ్ కేడర్ లీడర్లంతా ఎమ్మెల్యేల వద్ద తీవ్ర ప్రయత్నాలు చేస్తున్నారు.
ఈ విషయంపై కొద్ది రోజుల కింద ఉమ్మడి జిల్లాకు చెందిన ఓ ఎమ్మెల్యే సమక్షంలో హైదరాబాద్లో ప్రత్యేకంగా సమావేశం అయినట్లు తెలిసింది. కానీ, జిల్లాకు చెందిన ఓ ఎమ్మెల్యే గైర్హాజరుకావడం, ఆయన తన నియోజకవర్గానికి చెందిన లీడర్కే చైర్మన్ పదవి ఇవ్వాలని డిమాండ్ చేస్తున్నట్లు తెలిసింది. మరో నియోజకవర్గానికి చెందిన ఎమ్మెల్యే కూడా తన నియోజకవర్గానికే ఈ పదవి కావాలని ఎమ్మెల్యేల సంతకాల సేకరణ కూడా చేపడుతున్నట్లు సమాచారం. అలాగే మార్కెట్ కమిటీ, దేవాదాయ, గ్రంథాలయ పదవుల కోసం కూడా పోటీ నెలకొంది.
ప్రధానంగా చైర్మన్ పదవులను ఆశిస్తున్న వారిలో మహబూబ్నగర్ నుంచి మారేపల్లి సురేంద్ రెడ్డి, బురుజు సుధాకర్ రెడ్డి, ఎన్పీ వెంకటేశ్, సంజీవ్ ముదిరాజ్, లక్ష్మణ్ యాదవ్, సిరాజ్ఖాద్రీ, అమరేందర్రాజు, బెక్కరి అనిత, వసంత, జడ్చర్ల నుంచి బుక్కా వెంకటేశం, బాద్మి రవిశంకర్, నిత్యానందం, నారాయణపేట నుంచి యూత్ కాంగ్రెస్ జిల్లా అధ్యక్షుడు కోట్ల రవీందర్ రెడ్డి, నారాయణపేట పార్టీ మండల అధ్యక్షుడు సదాశివారెడ్డి, మాజీ జడ్పీ కో ఆప్షన్ సభ్యుడు ఎండీ గౌస్ ఉన్నారు.
ఏడు నెలలుగా పెండింగ్..
గత ఏడాది డిసెంబర్లో కాంగ్రెస్ అధికారంలోకి వచ్చింది. వెంటనే జీవో విడుదల చేయడంతో అప్పటి వరకు నామినేటెడ్ పదవుల్లో ఉన్న గత ప్రభుత్వంలోని పెద్దలు పదవుల నుంచి వైదొలిగారు. అప్పటి నుంచి ఈ పదవుల కోసం ఆశావహులు ఎదురు చూస్తున్నారు. కొద్ది రోజుల కింద ప్లానింగ్ కమిషన్ వైస్ చైర్మన్గా వనపర్తి జిల్లాకు చెందిన మాజీ మంత్రి జిల్లెల చిన్నారెడ్డి, మైనార్టీ కార్పొరేషన్ చైర్మన్ గా మహబూబ్నగర్ జిల్లాకు చెందిన ఒబేదుల్లా కొత్వాల్కు అవకాశం దక్కింది. ఆ తర్వాత మిగతా పోస్టులు కూడా భర్తీ అవుతాయని అందరూ భావించినా.. వెంటనే పార్లమెంట్ ఎన్నికల కోడ్ రావడంతో ఈ పదవుల భర్తీకి బ్రేక్ పడింది.
ఇటీవల కోడ్ ముగియడంతో వారం నుంచి ఈ పదవులను భర్తీచేసేందుకు రాష్ట్ర సర్కారు కసరత్తు చేస్తోంది. ప్రధానంగా జిల్లా స్థాయిలో మార్కెట్ కమిటీ చైర్మన్లు, వైస్ చైర్మన్లు, దేవాదాయ శాఖ చైర్మన్ పదవులు, జిల్లా గ్రంథాలయ సంస్థ చైర్మన్, మహబూబ్నగర్ అర్బన్ డెవలప్మెంట్ అథారిటీ(ముడా) చైర్మన్, డైరెక్టర్ పోస్టులు ఎవరెవరికి ఇవ్వాలనే దానిపై ఆరా తీస్తోంది. సామాజిక సమీకరణాల ఆధారంగా వీటిని భర్తీ చేయనున్నట్లు సమాచారం.
