కొత్తగూడెం రామక్రిష్ణ కుటుంబం సూసైడ్ కు కారణమైన వనమా రాఘవను ఇంతవరకు ఎందుకు అరెస్టు చేయలేదని ప్రశ్నించారు ఎమ్మెల్యే రాజాసింగ్. శుక్రవారం ఆయన ఇదే విషయంపై ఓ ప్రకటన విడుదల చేశారు. "రాఘవ వెనుక ఉన్న అదృశ్య శక్తి ఎవరు?. టీఆర్ఎస్ ఎమ్మెల్యేలు, వారి కుటుంబ సభ్యులు చేసే అరాచకాలకు సీఎం వత్తాసు పలుకుతుండు. వనమా రాఘవ ఆచూకీ దొరకలేదని పోలీసులు చెప్పడం సిగ్గు చేటు. ప్రభుత్వ అక్రమాలను ప్రశ్నిస్తే నిమిషాల్లో అరెస్టు చేసే పోలీసులు.. మానవ మృగాన్ని రోజుల తరబడి పట్టుకోలేకపోవడం సిగ్గు చేటు. అధికార పార్టీ నేతలు హత్యలు, హత్యాచారాలు, బెదిరింపులకు పాల్పడవచ్చని సీఎం ప్రత్యేకంగా లైసెన్సులిచ్చారా?. లేక అధికార పార్టీ నేతల అరాచకాలు ముఖ్యమంత్రికి, ఆయన కొడుకు కళ్లకు కన్పించకుండా కళ్లకు గంతలు కట్టుకున్నారా?. తక్షణమే వనమా రాఘవను అరెస్టు చేయాలి. తండ్రి ఎమ్మెల్యేగా ఉంటే విచారణ సాఫీగా సాగే అవకాశం లేదు. తక్షణమే ఎమ్మెల్యే పదవికి వనమా వెంకటేశ్వరరావు రాజీనామా చేయాలి. కొడుకుపై విచారణ జరిపేందుకు తండ్రి సహకరించాలి. ఈ అంశంపై సమగ్ర విచారణను పూర్తి చేసి నిందితుడికి సాధ్యమైనంత తొందరగా శిక్ష ఖారారు చేసేందుకు తక్షణమే ఫాస్ట్ ట్రాక్ కోర్టు ఏర్పాటు చేయాలి.
