పైనాపిల్.. తినే ఉంటారు. జ్యూస్ కూడా చాలామంది తాగి ఉంటారు. అయితే పైనాపిల్ని వండుకుని తిన్నా చాలా టేస్టీ ఉంటుందని తెలుసా! పైనాపిల్తో స్వీట్లు, సమ్మర్ డ్రింక్స్ తయారుచేసుకోవచ్చు. వాటిలోబర్ఫీ, హల్వా, షికంజి రెసిపీల గురించి ఈ వారం మీకోసం. మరి వాటి తయారీ విధానం ఎలాగో తెలుసుకోవాలంటే.. ఇక్కడ చదివేయండి.
బర్ఫీ
కావాల్సినవి :
చక్కెర, పైనాపిల్ ముక్కలు :ఒక్కోటి రెండు కప్పులు
నీళ్లు : మూడు కప్పులు,
యాలకుల పొడి : అర టీస్పూన్, కొబ్బరి ముక్కలు
కస్టర్డ్ పౌడర్ : ఒక్కో కప్పు
నెయ్యి : ఐదు టేబుల్ స్పూన్లు
నట్స్ : సరిపడా
తయారీ : పాన్లో చక్కెర, యాలకుల పొడి వేసి, నీళ్లు పోసి మరిగించాలి. మిక్సీజార్లో పైనాపిల్, కొబ్బరి ముక్కలు వేసి గ్రైండ్ చేయాలి. తర్వాత ఆ నీటిని వడకట్టాలి. అందులో కస్టర్డ్ పౌడర్ వేసి బాగా కలపాలి. ఆ మిశ్రమాన్ని చక్కెర పాకంలో పోస్తూ కలపాలి. దగ్గరపడేవరకు కలుపుతూ ఉడికించాలి. కాసేపయ్యాక నెయ్యి వేసి కలపాలి. పాన్కి అస్సలు అంటుకోకుండా ముద్దగా వచ్చేవరకు మిశ్రమాన్ని ఉడికించాలి. ఒక గిన్నెకి నూనె పూసి లేదా బటర్ పేపర్ వేసి అందులో పైనాపిల్ మిశ్రమం వేసి సమాంతరంగా పరవాలి. చల్లారాక ఫ్రిజ్లో పెట్టి దాదాపు రెండు గంటలు ఉంచాలి. ఆ తర్వాత తీసి ముక్కలుగా కట్ చేస్తే పైనాపిల్ బర్ఫీ తినడానికి రెడీ.
షికంజి
కావాల్సినవి :
పైనాపిల్ ముక్కలు : రెండు కప్పులు
చక్కెర : ఆరు టేబుల్ స్పూన్లు,
నిమ్మరసం : రెండు టేబుల్ స్పూన్లు
ఉప్పు : సరిపడా,చాట్ మసాలా, నల్ల ఉప్పు
జీలకర్ర పొడి : పావు టీస్పూన్ చొప్పున
పుదీనా : కొంచెం
తయారీ : మిక్సీజార్లో పైనాపిల్ ముక్కలు, చక్కెర వేసి గ్రైండ్ చేయాలి. ఆ మిశ్రమాన్ని వడకట్టాలి. ఒక గ్లాసులో నిమ్మరసం, ఉప్పు, చాట్ మసాలా, నల్ల ఉప్పు, జీలకర్ర పొడి, పైనాపిల్ గుజ్జు, పుదీనా వేయాలి. తర్వాత నీళ్లు లేదా సోడా పోసి, అవన్నీ కలిసేలా బాగా కలపాలి. అవసరమైతే ఐస్ క్యూబ్స్ వేసుకోవచ్చు. ఈ సమ్మర్కి బెస్ట్ డ్రింక్ తాగాలంటే ఇది ట్రై చేయొచ్చు.
హల్వా
కావాల్సినవి :
చక్కెర : ఒక్కోటి ముప్పావు కప్పు, నెయ్యి, బాదం, జీడిపప్పు
ఎండుద్రాక్ష : సరిపడా
బొంబాయి రవ్వ : ఒక కప్పు
పైనాపిల్ ముక్కలు : ఒకటిన్నర కప్పు
నీళ్లు : మూడున్నర కప్పులు
యాలకుల పొడి : ఒక టీస్పూన్
తయారీ : పాన్లో నెయ్యి వేడి చేసి అందులో బాదం, జీడిపప్పు తరుగు, ఎండుద్రాక్షలు వేసి వేగించి పక్కన పెట్టాలి. తర్వాత మరికాస్త నెయ్యి వేసి బొంబాయిరవ్వను వేగించి ఒక గిన్నెలో తీసి చల్లారనివ్వాలి. అదే పాన్లో మరో పైనాపిల్ ముక్కలు, కొంచెం చక్కెర వేసి వేగనివ్వాలి. అవి వేగాక నీళ్లు పోసి కలపాలి. నీళ్లు మరిగాక అందులో బొంబాయి రవ్వ వేసి బాగా కలపాలి. మూతపెట్టి నీళ్లు ఇంకేవరకు ఉడికించాలి. ఆ తర్వాత మిగిలిన చక్కెర, యాలకుల పొడి వేసి మరోసారి కలపాలి. చివరిగా కొద్దిగా నెయ్యి వేసి, వేగించిన డ్రైఫ్రూట్స్ కూడా వేసి కలిపితే తినడమే తరువాయి.
