సమ్మర్ సీజన్లో తినాలనిపించే పండ్లలో పుచ్చకాయ ఒకటి. తింటుంటే మెత్తగా, చల్లగా ఉండే ఈ వాటరీ ఫ్రూట్కి ‘నో’ చెప్పేవాళ్లు చాలా తక్కువగా ఉంటారు. అలాంటి ఈ పుచ్చకాయతో వెరైటీ రెసిపీలు వండొచ్చు తెలుసా? ఆ వెరైటీ మెలన్ రెసీపీలే ఇవి...
వాటర్ మెలన్ లెమనేడ్
కావాల్సినవి :
పుచ్చకాయ - సగం
నిమ్మకాయలు - రెండు
అల్లం - చిన్న ముక్క
తయారీ : పుచ్చకాయ ముక్కలు కట్ చేసి గింజలు తీసేయాలి. అల్లం సన్నగా తరిగి పుచ్చకాయ ముక్కల్లో వేయాలి. ఆ రెండింటినీ కలిపి మిక్సీజార్లో వేయాలి. అందులో ఐస్ ముక్కలు కూడా వేసి మెత్తగా గ్రైండ్ చేయాలి. తర్వాత నిమ్మరసం పిండాలి. ఆ జ్యూస్ని వడ కట్టాలి. ఒక గ్లాస్లో ఐస్ ముక్కలు వేసి, నిమ్మ చెక్క ఒకటి వేసి దానిపైనుంచి జ్యూస్ పోయాలి.
వాటర్ మెలన్ జెల్లీ
కావాల్సినవి :
పుచ్చకాయ జ్యూస్ - రెండు కప్పులు
చక్కెర - అర కప్పు
కార్న్ ఫ్లోర్(మొక్కజొన్న పిండి) - పావు కప్పు
నీళ్లు - పావు కప్పు
ఎండు కొబ్బరి పొడి - సరిపడా
తయారీ : పుచ్చకాయను ముక్కలు తరిగి గింజలు తీసేయాలి. వాటిని మిక్సీజార్లో వేసి మెత్తగా గ్రైండ్ చేయాలి. ఆ జ్యూస్ని ఒక గిన్నెలో పోయాలి. అందులో చక్కెర కావాలంటే ఫుడ్ కలర్ కూడా వేసి కలపాలి. మరో గిన్నెలో కార్న్ ఫ్లోర్ వేసి అందులో నీళ్లు పోసి కలపాలి. ఒక గిన్నెలో పుచ్చకాయ జ్యూస్ వేడి చేయాలి. అది మరిగాక అందులో కార్న్ ఫ్లోర్ మిశ్రమం పోయాలి. మరికాసేపు మరిగించాక ఐదు నిమిషాలు చల్లార్చాలి. చల్లారిన జ్యూస్ని గాజు గ్లాస్ల్లో పోసి ఫ్రిజ్లో పెట్టాలి. ఒక గంట తర్వాత బయటకు తీసి వాటిని ముక్కలుగా కోయాలి. ఆ ముక్కల్ని కొబ్బరి పొడిలో దొర్లించాలి. చూడ్డానికి కలర్ఫుల్గా.. తింటే సూపర్ టేస్టీగా ఉంటుంది ఈ డెజర్ట్.
మిల్క్షేక్
కావాల్సినవి :
పుచ్చకాయ ముక్కలు - ఒక కప్పు
తులసి లేదా సబ్జా గింజలు - ఒక టేబుల్ స్పూన్
చక్కెర - రెండు టేబుల్ స్పూన్లు
పాలు - ఒకటిన్నర కప్పు
వెనీలా ఐస్క్రీమ్ - ఒక స్కూప్
తయారీ : గిన్నెలో తులసి లేదా సబ్జా గింజలు వేసి, నీళ్లు పోసి నానబెట్టాలి. మిక్సీజార్లో పుచ్చకాయ ముక్కలు, చక్కెర వేసి పాలు పోసి మెత్తగా గ్రైండ్ చేయాలి. నానబెట్టిన తులసి లేదా సబ్జా గింజలు, కొన్ని పుచ్చకాయ ముక్కల్ని ఒక గ్లాస్లో వేయాలి. మిక్సీ పట్టిన మిల్క్ షేక్ అందులో పోసి స్ట్రాతో బాగా కలపాలి. దానిపై వెనీలా ఐస్క్రీమ్ పెట్టాలి. అంతే.. డెలీషియస్గా ఉండే వాటర్ మెలన్ మిల్క్ షేక్ రెడీ.
పుడ్డింగ్
కావాల్సినవి :
పుచ్చకాయ ముక్కలు - మూడు కప్పులు
కస్టర్డ్ పౌడర్ - పావు కప్పు
చక్కెర - పావు కప్పు
వెనీలా ఎసెన్స్ - పావు టీస్పూన్
తయారీ : మిక్సీజార్లో పుచ్చకాయ ముక్కలు వేసి మెత్తగా గ్రైండ్ చేసి, జ్యూస్ వడకట్టాలి. ఒక గిన్నెలో కస్టర్డ్ పౌడర్ వేసి రెండు కప్పుల పుచ్చకాయ జ్యూస్ పోసి బాగా కలపాలి. మరో గిన్నెలో ఒక కప్పు పుచ్చకాయ జ్యూస్ పోసి చక్కెర వేసి కలపాలి. ఐదు నిమిషాలు బాగా ఉడికించి, అందులో కస్టర్డ్ పౌడర్ మిశ్రమం పోసి కలపాలి. తర్వాత వెనీలా ఎసెన్స్ కూడా వేసి మరికాసేపు ఉడికించాలి. మిశ్రమం దగ్గర పడ్డాక ఒక ప్లేట్లోకి తీయాలి. పూర్తిగా చల్లారేవరకు దాన్ని పక్కన ఉంచాలి. తరువాత ఫ్రిజ్లో పెట్టి ఒక గంట తర్వాత తీస్తే కలర్ఫుల్ కేక్లా కనిపిస్తుంది. దాన్ని ప్లేట్లో బోర్లించి, ముక్కలు కట్ చేసుకుని తినడమే.
హల్వా
కావాల్సినవి :
పుచ్చకాయ - ఒకటి
కార్న్ ఫ్లోర్ - అర కప్పు
చక్కెర - అర కప్పు
నెయ్యి - ఒక టీస్పూన్
జీడిపప్పు తరుగు - ఒక టేబుల్ స్పూన్
యాలకులు - రెండు
చక్కెర - ఒకటిన్నర టీస్పూన్
నల్ల నువ్వులు - సరిపడా
తయారీ : పుచ్చకాయ ముక్కల్ని మిక్సీజార్లో వేసి మెత్తగా గ్రైండ్ చేసి, జ్యూస్ వడకట్టాలి. ఆ జ్యూస్లో కార్న్ఫ్లోర్, చక్కెర వేసి బాగా కలపాలి. నెయ్యి వేడి చేసి జీడిపప్పు తరుగు వేగించాలి. అదే నెయ్యిలో పుచ్చకాయ మిశ్రమం పోయాలి. యాలకులు, చక్కెర కలిపి గ్రైండ్ చేసి, ఆ పొడిని కూడా ఇందులో వేసి కలపాలి. అలా కాసేపు మిశ్రమాన్ని కలుపుతూ ఉడికించాలి. దగ్గర పడ్డాక నెయ్యి, వేగించిన జీడిపప్పు తరుగు కలపాలి. ఒక ప్లేట్కి నెయ్యి పూసి అందులో హల్వా మిశ్రమం వేసి సమానంగా పరవాలి. దానిపై నల్ల నువ్వులు చల్లి, పక్కన పెట్టాలి. ఆరు గంటలు చల్లారాక ఆ ప్లేట్ని మరో ప్లేట్లోకి బోర్లించాలి.
టాంగులు
కావాల్సినవి :
పుచ్చకాయ - ఒకటి
చక్కెర - అర కప్పు
నీళ్లు - సరిపడా
తయారీ : పుచ్చకాయ శుభ్రంగా కడిగి తొక్క తీయాలి. తర్వాత ఐస్క్రీమ్ వేసే చిన్న సైజ్ స్కూప్లతో పుచ్చకాయ నుంచి గుండ్రని స్కూప్స్ తీయాలి. నాలుగు స్కూప్లను నాలుగు పుల్లలకు గుచ్చాలి. పాన్లో చక్కెర వేసి నీళ్లు పోసి మరిగించాలి. తర్వాత పుచ్చకాయ స్కూప్లు ఉన్న పుల్లలను వేడి వేడి చక్కెర పాకంలో ముంచాలి. ఆ తర్వాత ఒక గ్లాస్లో ఐస్ ముక్కలు, చల్లటి నీళ్లు పోయాలి. పాకంలో ముంచిన పుల్లల్ని తీసి వెంటనే ఐస్ వాటర్లో పెడితే వాటర్ మెలన్ టాంగులు రెడీ. కాసేపటి తర్వాత వాటిని తీసి తింటే ఒకలాంటి అడ్వెంచరస్ టేస్ట్ నోటికి అందుతుంది.
