ఈ చలికాలంలో చీటికీ మాటికీ వచ్చే హెల్త్ ఇష్యూస్కి చెక్ పెట్టాలంటే ఇమ్యూనిటీ పెంచుకోవాల్సిందే. అది కూడా శ్నాక్స్తో. ఇది సాధ్యమేనా? అనుకుంటున్నారా.. నిజమే! శ్నాక్స్.. అనగానే చాలామందికి నూనెతో వేగించినవి, జంక్ ఫుడ్స్ వంటివి గుర్తొస్తాయి. కానీ, కాస్త పరిశీలిస్తే హెల్దీ శ్నాక్స్ కూడా ఉంటాయి. మరి ఇమ్యూనిటీ పెంచుకునేలా శ్నాక్స్ ఏమున్నాయంటే ఇవిగో వీటిపై ఓ లుక్కేయండి.
ఎగ్ - బ్రెడ్ రోల్
కావాల్సినవి :
కోడిగుడ్లు – ఐదు
క్యారెట్, ఉల్లిగడ్డ,క్యాప్సికమ్ తరుగు – ఒక్కోటి పావు కప్పు
పచ్చిమిర్చి – మూడు
కారం లేదా చిల్లీ ఫ్లేక్స్ – ఒక టీస్పూన్
గరం మసాలా – అర టీస్పూన్
ఉప్పు – సరిపడా
టొమాటో సాస్ – రెండు టేబుల్ స్పూన్లు
బ్రెడ్ స్లైస్లు – పది
తయారీ : నాలుగు కోడిగుడ్లను ఉడికించి, తొక్క తీసి, తురిమి ఒక గిన్నెలో వేయాలి. అందులో రెండు బ్రెడ్ స్లైస్లను ముక్కలు చేసి వేయాలి. తర్వాత క్యారెట్, ఉల్లిగడ్డ, క్యాప్సికమ్ తరుగు, పచ్చిమిర్చి, కారం, గరం మసాలా, ఉప్పు, టొమాటో సాస్ వేసి బాగా కలపాలి. మరోవైపు ఒక చిన్న గిన్నెలో కోడిగుడ్డు సొన, ఉప్పు వేసి కలపాలి. బ్రెడ్ స్లైస్ని నాలుగు వైపులా చివర్లు కట్ చేయాలి. ఒకవైపు కోడిగుడ్డు సొన పూయాలి. మధ్యలో రెడీ చేసిపెట్టుకున్న స్టఫింగ్ని పెట్టి రోల్ చేయాలి. ఇలా చేసుకున్న రోల్స్ని గ్రిల్ పాన్ మీద నూనె వేసి రెండు వైపులా కాల్చాలి. ఎంతో టేస్టీ, హెల్దీ రోల్స్ని కెచప్తో తింటే బాగుంటాయి.
పీనట్ స్టిక్స్
కావాల్సినవి :
పల్లీలు, బెల్లం – ఒక్కో కప్పు
నువ్వులు – అర కప్పు
కొబ్బరి పొడి – సరిపడా
నీళ్లు – రెండు టీస్పూన్లు
తయారీ : పాన్లో పల్లీలు, నువ్వులు వేరువేరుగా వేగించి పక్కన పెట్టాలి. పల్లీలు పొట్టు తీసి, మిక్సీలో వేసి గ్రైండ్ చేయాలి. అదే పాన్లో బెల్లం వేసి, నీళ్లు పోసి పాకం వచ్చేవరకు మరిగించాలి. మిశ్రమం దగ్గరపడ్డాక అందులో పల్లీల పొడి వేసి బాగా కలపాలి. తర్వాత నువ్వులు కూడా వేసి మరోసారి కలపాలి. ఆ మిశ్రమాన్ని ఒక ప్లేట్లో వేయాలి. అది కాస్త వేడిగా ఉండగానే, చేతిని తడుపుకుంటూ మిశ్రమాన్ని స్టిక్స్లా చేయాలి. తర్వాత కొబ్బరి పొడిలో దొర్లించాలి.
ప్రొటీన్ బార్
కావాల్సినవి :
కొబ్బరి పొడి, బాదం, జీడిపప్పు, అవిసె, గుమ్మడి గింజలు –ఒక్కో కప్పు చొప్పున
కర్జూరలు – మూడు కప్పులు
చియా గింజలు, నువ్వులు, చాకొలెట్ సిరప్ – ఒక్కోటి అర కప్పు
పీనట్ బటర్ – పావు కప్పు
తయారీ : పాన్లో మొదట బాదం, జీడిపప్పు, గుమ్మడి గింజలు వేగించాలి. అదే పాన్లో అవిసె, చియా గింజలు, కొబ్బరి పొడి వేగించి పక్కన పెట్టాలి. ఇవన్నీ చల్లారాక మిక్సీజార్లో వేసి బరకగా గ్రైండ్ చేయాలి. ఆ తర్వాత కర్జూరల్ని మెత్తగా అయ్యేవరకు వేగించాలి. వాటికి కూడా ఈ మిశ్రమంలో వేసి బాగా కలపాలి. ఒక ట్రేలో బటర్ పేపర్ వేసి దానిపై ఈ మిశ్రమాన్ని సమాంతరంగా పరవాలి. దానిపై చాకొలెట్ సిరప్ పూయాలి. ఆ ట్రేని నాలుగ్గంటలపాటు ఫ్రిజ్లో పెట్టాలి. ఆ తర్వాత తీసి చాకుతో కట్ చేసుకోవాలి. ఎంతో హెల్దీ అయిన ఈ ప్రొటీన్ బార్స్ పిల్లలు, పెద్దలు అందరూ తినొచ్చు.
