ఐసీసీ తాజాగా ప్రకటించిన టీ20 బౌలింగ్ ర్యాంకింగ్స్ లో టీమిండియా లెగ్ స్పిన్నర్ వరుణ్ చక్రవర్తి సత్తా చాటాడు. ఏకంగా 25 స్థానాలు ఎగబాకి టాప్ 5 లో స్థానం సంపాదించాడు. 679 రేటింగ్ పాయింట్లతో ఐదో స్థానంలోనిలిచాడు. ఇంగ్లాండ్ తో ప్రస్తుతం జరుగుతున్న సిరీస్ లో ఈ లెగ్ స్పిన్నర్ అద్భుతంగా రాణించాడు. తొలి మూడు టీ20ల్లోనే 7.08 ఎకానమీ రేట్‌తో ఏకంగా 10 వికెట్లు పడగొట్టాడు. రాజ్ కోట్ వేదికగా మంగళవారం (జనవరి 28) ఇంగ్లాండ్ తో జరిగిన మూడో టీ20 మ్యాచ్ లో 5 వికెట్లతో చెలరేగాడు. 4 ఓవర్లలో కేవలం 24 పరుగులే ఇచ్చి ఐదు వికెట్లకు పడగొట్టాడు.
వరుస ఓవర్లలో జోస్ బట్లర్(24), జామీ ఓవర్టన్(0), జామీ స్మిత్(6), బ్రైడన్ కార్సే(6)లను పెవిలియన్ కు పంపాడు. రేటింగ్ పాయింట్లతో ఇంగ్లాండ్ స్పిన్నర్ ఆదిల్ రషీద్ టాప్ ర్యాంక్ కు చేరుకున్నాడు. అకేల్ హోసేన్ (707 రేటింగ్ పాయింట్లు), వనిందు హసరంగా (698 రేటింగ్ పాయింట్లు) ఆడమ్ జంపా (694 రేటింగ్ పాయింట్లు) వరుసగా రెండు, మూడు, నాలుగు స్థానాల్లో ఉన్నారు. టీ20 బౌలింగ్ ర్యాంకింగ్స్ లో టాప్ 5 లో స్పిన్నర్లే ఉండడం విశేషం. ఇంగ్లండ్‌ పేసర్‌ జోఫ్రా ఆర్చర్‌ 13 స్థానాలు ఎగబాకి ఆరో స్థానంలో నిలిచాడు.
718 రేటింగ్ పాయింట్లతో టీ20 బ్యాటింగ్ ర్యాంకింగ్స్ లో టీమిండియా యువ ఆటగాడు తిలక్ వర్మ రెండో స్థానానికి చేరుకోవడం విశేషం. ప్రస్తుతం జరుగుతున్న ఇంగ్లాండ్ సిరీస్ లో తిలక్ వర్మ వరుసగా 19*, 72*, 18 పరుగులు చేశాడు. ఆస్ట్రేలియా ఆటగాడు ట్రావిస్ హెడ్ నెం.1 ర్యాంక్‌లో కొనసాగుతున్నాడు. తిలక్ వర్మకు, హెడ్‌కి మధ్య కేవలం 23 పాయింట్లు వ్యత్యాసం ఉంది. సూర్య కుమార్ యాదవ్ నాలుగో ర్యాంక్ లో.. జైశ్వాల్ 9 వ ర్యాంక్ లో ఉన్నారు.
