- ‘వెలుగు’ ఇంటర్వ్యూలో పీయూ కొత్త వీసీ శ్రీనివాస్
- స్టూండెట్లకు మినిమం ఫెసిలిటీస్ కల్పిస్తాం
- త్వరలో కొత్త కోర్సులు అందుబాటులోకి తెస్తాం
- వచ్చే అకడమిక్ ఇయర్ నుంచి లా, ఇంజనీరింగ్ క్లాసెస్ స్టార్ట్ చేస్తాం
మహబూబ్నగర్ రూరల్, వెలుగు: పాలమూరు యూనివర్సిటీ (పీయూ)ని పాలకులు, సిబ్బంది సహకారంతో అన్ని విధాలుగా అభివృద్ధి చేస్తానని వైస్ చాన్స్లర్ శ్రీనివాస్ తెలిపారు. పీయూ నూతన వీసీగా బాధ్యతలు తీసుకున్న ఆయనను ‘వెలుగు’ ఇంటర్వ్యూ చేసింది.
ప్ర : సీఎం సొంత జిల్లాలోని యూనివర్సిటీ కావడం వల్ల ఒత్తిడి ఉందా?
జ : పాలమూరు జిల్లాకు ఎన్నో ప్రత్యేకతలు ఉన్నాయి. సీఎం ఎనుముల రేవంత్ రెడ్డి సొంత జిల్లా కావడంతో పీయూపై
ఆయనకు ప్రత్యేక శ్రద్ధ ఉంది. వర్సిటీని మరింత డెవలప్ చేయాలనే ఉద్దేశంతోనే లా, ఇంజనీరింగ్ కాలేజీలకు పర్మిషన్లు వచ్చాయి. రాష్ట్ర సర్కారు కూడా పీయూ అభివృద్ధికి సహాయ సహకారాలు అందించేందుకు సిద్ధంగా ఉంది.
ప్ర : ప్రస్తుతం మీ ముందున్న టాస్క్?
జ : నేను ఎలాంటి టాస్క్లు నిర్దేశించుకోలేదు. నా లక్ష్యం వర్సిటీలో స్టూడెంట్లకు ఎలాంటి ఇబ్బందులు కలగకుండా చూసుకోవడమే. హాస్టల్, మెస్కు సరిపడా బిల్డింగ్స్ను అందుబాటులోకి తెస్తాం. స్టూడెంట్లకు కావాల్సిన మినిమం ఫెసిలిటీస్ కల్పిస్తాం. స్పోర్ట్స్ అండ్ గేమ్స్ కూడా నిర్వహిస్తాం. పీయూను అన్నిరంగాల్లో అగ్రగామిగా తీర్చిదిద్దుతాం.
ప్ర : పీయూ డెవలప్మెంట్కు మీరు తీసుకునే యాక్షన్?
జ : ప్రతి ఏడాది కేంద్ర, రాష్ట్ర ప్రభుత్వాల ద్వారా వచ్చే నిధులతో వర్సిటీ డెవలప్మెంట్ పనులు చేపడతాం. ఇంకా అవసరమయ్యే నిధుల కోసం ఎంపీ, మంత్రి, ఎమ్మెల్యేల సహకారం తీసుకుంటా.
ప్ర : లా, ఇంజనీరింగ్ కాలేజీలకు స్థలం ఉందా?
జ : పీయూ దాదాపు 170 ఎకరాల్లో విస్తరించి ఉంది. ఇప్పటికే దాదాపు 24 ఎకరాల్లో ఔషధ మొక్కల గార్డెన్లు ఉన్నాయి. లా, ఇంజనీరింగ్ కాలేజీల బిల్డింగులకు స్థలాన్ని పరిశీలిస్తాం. అవసరమైతే ప్రభుత్వానికి ప్రతిపాదనలు పెట్టి అదనంగా ల్యాండ్ అలాట్ చేయమని కోరతాం.
ప్ర : ఈ కాలేజీలు ఎప్పటి నుంచి స్టార్ట్ అవుతాయి?
జ : లా, ఇంజనీరింగ్ కాలేజీల ఏర్పాటుకు గ్రీన్ సిగ్నల్ వచ్చింది. వచ్చే అకడమిక్ ఇయర్ వరకు బిల్డింగ్ను పూర్తి చేస్తాం. అదే ఏడాది నుంచి తరగతులను ప్రారంభిస్తాం.
ప్ర : కొత్త కోర్సులు ఉంటాయా?
జ : గతేడాది రెండు కొత్త కోర్సులను ప్రవేశపెట్టారు. వచ్చే అకడమిక్ ఇయర్లో ఏమైనా కొత్త కోర్సులు తీసుకురావాలా? అనే దానిపై మీటింగ్ పెట్టుకుంటాం. ఉన్న కోర్సులను రివైజ్ కూడా చేస్తాం. కొత్త కోర్సులను ప్రవేశ పెట్టేందుకు ప్రయత్నాలు కూడా చేస్తాం.
ప్ర : కాంట్రాక్ట్ లెక్చరర్ల పరిస్థితి ఏంటి? నాన్ టీచింగ్ సిబ్బంది కాంట్రాక్ట్ ఉద్యోగులుగా గుర్తించాలని డిమాండ్ చేస్తున్నారు? దీనిపై మీ కామెంట్?
జ : కాంట్రాక్ట్ లెక్చరర్లను రెగ్యులరైజ్ చేయాలని కొంత కాలంగా అడుగుతున్నారు. ఇష్యూ నా దృష్టికి వస్తే.. వాళ్లను రెగ్యులరైజ్ చేయాలని రాష్ట్ర ప్రభుత్వాన్ని కోరతా. నాన్ టీచింగ్ ఉద్యోగుల సమస్యలు తెలుసుకొని వీసీ పరిధిలో ఉంటే పరిష్కరిస్తాం. మా పరిధి దాటి ఉంటే గవర్నమెంట్ అప్రూవల్ తీసుకొని సమస్య పరిష్కరించేందుకు కృషి చేస్తా.
ప్ర : పీయూకు రూ.వంద కోట్ల ఫండ్స్ వచ్చాయి. ఆ ఫండ్స్ దేనికి ఖర్చు చేస్తున్నారు?
జ : కొన్ని వర్సిటీలకు ఇటీవల సెంట్రల్ నుంచి రూ.వంద కోట్లు వచ్చాయి. అందులో పాలమూరుకు కూడా ఈ ఫండ్స్ కేటాయించారు. ఇప్పటికే చేయాల్సిన అభివృద్ధి పనులకు సంబంధించిన ప్రపోజల్స్ రెడీ చేసి ప్రభుత్వానికి పంపారు. దాని ప్రకారమే నిధులు విడుదల చేస్తారు. అందులో ఎలాంటి మార్పు ఉండదు.
ప్ర : స్టూడెంట్లకు మీరిచ్చే సలహా?
జ : సీఎం సహాయ సహకారాలతో పీయూలో అన్ని ఫెసిలిటీస్ కల్పిస్తాం. స్టూడెంట్లు కూడా వాటిని యుటిలైజ్ చేసుకోవాలి. హాస్టళ్లు, లైబ్రరీలను వినియోగించుకోవాలి. రానున్న రెండేళ్లల్లో స్టూడెంట్లు ఉన్నతంగా ఎదగాలి.
