హైదరాబాద్ సిటీ, వెలుగు: ధర్మ రక్షణ కోసం విశ్వహిందూ పరిషత్ను విస్తరించాలని ఆ సంస్థ పెద్దలు పిలుపునిచ్చారు. గ్రామాలు, తండాలు, అటవీ ప్రాంతాల్లో అవగాహన కార్యక్రమాలకు ప్లాన్ చేయాలన్నారు. అన్నోజిగూడలోని రాష్ట్రీయ విద్యా కేంద్రంలో ఈ నెల 22 నుంచి 24 వరకు వీహెచ్ పీ రాష్ట్ర కార్యవర్గ సమావేశాలు నిర్వహించారు. సోమవారం వీహెచ్పీ అఖిల భారత సంఘటన్ సహకార్యదర్శి వినాయకరావు దేశ్ పాండే, ఆర్ఎస్ఎస్ తెలంగాణ ప్రాంత ప్రచారక్ లింగం శ్రీధర్, దక్షిణ భారత సంఘటన్ కార్యదర్శి స్థాను మలయన్, భాగ్యనగర్ క్షేత్ర సంఘటన్ కార్యదర్శి గుమ్మల్ల సత్యం, భాగ్యనగర్ క్షేత్ర కార్యదర్శి తనికెళ్ల సత్య రవికుమార్ పాల్గొని మాట్లాడారు.
వీహెచ్పీ రాష్ట్ర అధ్యక్షుడు నరసింహమూర్తి అధ్యక్షత వహించారు. నాయకులు మాట్లాడుతూ.. గ్రామ స్థాయిలో విశ్వహిందూ పరిషత్ బలం పెరిగితే మత మార్పిడిలు ఆగిపోతాయన్నారు. వీహెచ్పీ లీడర్లు బండారి రమేశ్, పండరినాథ్, సునీతారెడ్డి, రామ్ సింగ్, భాస్కర్ రావు, సహకార్యదర్శి తోట భానుప్రసాద్, వెంకటేశ్వరరాజు, రమేశ్, పగుడాకుల బాలస్వామి, కుమారస్వామి, శివరాములు, పద్మశ్రీ, వాణీసక్కుబాయి పాల్గొన్నారు.
