బాధితురాలి పేరును తొలగించండి

కోల్​కతా​ వైద్యురాలి ఘటనలో వికీపీడియాకు సుప్రీం ఆదేశం

న్యూఢిల్లీ: దేశమంతటా సంచలనంగా మారిన కోల్​తాలోని ఆర్జీ కర్ ​డాక్టర్​ రేప్, మర్డర్​ కేసులో సుప్రీంకోర్టు కీలక వ్యాఖ్యలు చేసింది. బాధితురాలి ఫొటో, పేరు, గుర్తింపును ఎక్కడా.. ఏ రూపంలోనూ వాడొద్దని ఆదేశించింది. ఆమెకు సంబంధించిన వివరాలన్నింటినీ వెంటనే తొలగించాలని వికీపీడియాను ఆదేశించింది. కోల్​కతా డాక్టర్ ​రేప్, మర్డర్​ఘటనపై సుప్రీంకోర్టు మంగళవారం మరోసారి విచారణ జరిపింది. 

అత్యాచార ఘటనలో బాధితురాలి వివరాలను వెల్లడించడాన్ని భారతీయ చట్టాలు అనుమతించవని  సీజేఐ డీవై చంద్రచూడ్​నేతృత్వంలోని బెంచ్ పేర్కొన్నది. బాధితురాలి ఫొటో, పేరును వికీపీడియా నుంచి తొలగించేలా చర్యలు తీసుకోవాలని సొలిసిటర్ ​జనరల్ ​తుషార్​మెహతాను ఆదేశించింది. అలాగే, సీబీఐ తాజాగా సమర్పించిన కేసు స్టేటస్ ​రిపోర్ట్​ను బెంచ్​ పరిశీలించింది. రిపోర్ట్​లోని విషయాలు దిగ్భ్రాంతి కలిగించాయని పేర్కొంది. ఘటన జరిగిన తర్వాత ఆలస్యంగా ఐదు రోజులకు కేసును సీబీఐకి అప్పగించడం వల్ల కేసులో పురోగతి మందగించిందని జస్టిస్ ​డీవై చంద్రచూడ్​ అభిప్రాయపడ్డారు. కేసు విచారణను వారానికి వాయిదా వేసింది.

మహిళలకు నైట్ డ్యూటీ వద్దంటారా?

ఆర్జీ కర్​ ఘటన తర్వాత మహిళలకు నైట్ డ్యూటీలు వేయొద్దంటూ బెంగాల్​ సర్కారు నోటిఫికేషన్ ​జారీ చేయడాన్ని సుప్రీంకోర్టు తప్పుపట్టింది. ‘‘మహిళలు రాత్రిపూట పనిచేయలేరని మీరెలా చెప్తారు?” అని సీజేఐ చంద్రచూడ్ ప్రశ్నించారు. దీంతో ఆ నోటిఫికేషన్​ను రద్దు చేస్తున్నట్టు బెంగాల్​ సర్కారు తెలిపింది. 

కోల్​కతా నగర పోలీస్​ కమిషనర్​పై వేటు

డాక్టర్ల ఆందోళన నేపథ్యంలో కోల్​కతా నగర పోలీస్​కమిషనర్​పై మమత సర్కారు వేటు వేసింది. డాక్టర్ల బృందానికి ఇచ్చిన హామీ మేరకు సీఎం మమతా బెనర్జీ.. సీపీ,  మెడికల్​ఎడ్యుకేషన్​ డైరెక్టర్, హెల్త్​ సర్వీస్ ​డైరెక్టర్​ల​ను తొలగించింది.