- మూడు గంటల పాటు ధర్నా
మంచిర్యాల, వెలుగు : కొత్తగా ప్రకటించిన మంచిర్యాల కార్పొరేషన్లో తమ గ్రామాన్ని కలపొద్దని హాజీపూర్ మండలం నర్సింగ పూర్ గ్రామస్తులు రోడ్డెక్కారు. పంచాయతీగానే ఉంచాలని డిమాండ్ చేశారు. ఇటీవల మంచిర్యాల మున్సిపాలిటీని కార్పొరేషన్గా అప్గ్రేడ్ చేస్తూ హాజీపూర్ మండలంలోని 8 గ్రామాలను విలీనం చేస్తూ గెజిట్ రిలీజ్ చేశారు. దీన్ని వ్యతిరేస్తూ నర్సింగపూర్ గ్రామస్తులు భారీ సంఖ్యలో సోమవారం ఉదయం ఎన్హెచ్63పైకి చేరుకొని ధర్నాకు పూనుకున్నారు. సమాచారం అందుకున్న పోలీసులు భారీ సంఖ్యలో అక్కడికి చేరుకున్నారు.
మంచిర్యాల ఏసీపీ ప్రకాశ్, తహసీల్దార్ శ్రీనివాస్ దేశ్పాండే గ్రామస్తులకు నచ్చజెప్పే ప్రయత్నం చేసినా వినిపించుకోలేదు. అరెస్టు చేస్తామని పోలీసులు హెచ్చరించడంతో హైవే పక్కన ధర్నా చేశారు. కలెక్టర్ రావాలంటూ 3 గంటల పాటు నిరసన తెలిపారు. వారి సమస్యను కలెక్టర్ దృష్టికి తీసుకుపోతామని తహసీల్దార్, ఏసీపీలు హామీ ఇవ్వడంతో ఆందోళన విరమించారు. ఈ సందర్భంగా పలువురు మాట్లాడుతూ నర్సింగాపూర్లో 2500 జనాభా ఉందని, 70 శాతం మంది కూలి పని పైనే ఆధారపడి బతుకుతున్నామన్నారు.
ఉపాధి హామీ స్కీమ్తో వంద రోజులు ఉపాధి పొందున్నామని, కార్పొరేషన్ లో కలిపితే తిండికి తిప్పలు పడాల్సి వస్తుందని ఆవేదన వ్యక్తం చేశారు. ప్రజాప్రతినిధులు, నాయకులు అమ్ముడుపోయారంటూ మండిపడ్డారు. రెండు రోజుల్లో న్యాయం చేయకపోతే పోరాటం ఉదృతం చేస్తామని హెచ్చరించారు.
