మైలారంలో మైనింగ్​ చిచ్చు..ఎకో సెన్సిటివ్​ జోన్​లో అనుమతులు

• పోలీస్​ పహారాలో తవ్వకాలు
• గ్రామస్తుల ఆందోళన బేఖాతర్​
• బతుకుదెరువు కోల్పోతామంటున్న గ్రామస్తులు

మైలారం(నాగర్ కర్నూల్), వెలుగు :  నల్లమల టైగర్​ రిజర్వ్​కు 2 కిలోమీటర్ల దూరంలో ఎకో సెన్సిటివ్​ జోన్​లో ఉన్న మైలారం గుట్టపై మైనింగ్​ తవ్వకాలకు అనుమతులు ఇవ్వడాన్ని గ్రామస్తులు తీవ్రంగా వ్యతిరేకిస్తున్నారు. మైనింగ్​కు వ్యతిరేకంగా ఆరేండ్లుగా ఆందోళన చేస్తున్నా, గుట్టను బద్దలు కొడుతున్నారు. మండల ఆఫీసులు, కలెక్టరేట్​ ఎదుట ఆందోళనలు, ధర్నాలు చేసినా పట్టించుకోవడం లేదని అంటున్నారు. ఇటీవల జరిగిన పార్లమెంట్​ ఎన్నికలను బహిష్కరించి తమ నిరసన తెలిపినా మైనింగ్​కు అడ్డుకట్టపడలేదు.

గతంలో మైలారం గ్రామానికి 50 మీటర్ల దూరంలో ఉన్న గుట్టపై మైనింగ్​కు అనుమతులు తిరస్కరించిన ఎన్విరాన్​మెంట్, పొల్యూషన్​ కంట్రోల్​ బోర్డ్​ మారిన నివేదికల ఆధారంగా ఆదేశాలను మార్చుకుంది. పోలీసుల పహారాలో గుట్టను తవ్వుతూ క్వార్డ్జ్, ఫెల్​స్పర్​ను తరలిస్తున్నారు. 400 ఇండ్లు,1500 జనాభా ఉన్న మైలారం గ్రామం మైనింగ్​ దుమ్ములో కలిసిపోతోందని ప్రజలు ఆవేదన వ్యక్తం చేస్తున్నారు. చెరువుపై ఆధారపడిన మూడు గ్రామాలకు చెందిన 1,500 మంది మత్స్యకారుల కుటుంబాల జీవనాధారం పోతుందని, గుట్టపై ఆధారపడిన పశువులు, మేకలు, గొర్రెలకు పశుగ్రాసం ఎలాగని వాపోతున్నారు.

మైనింగ్​ ఆఫీసర్ల మాయాజాలం..

2018లో మైలారం గుట్టపై సర్వే నెం.120/1లో 24.28 హెక్టార్లలో 20 ఏండ్ల పాటు క్వార్ట్జ్, ఫెల్​స్పర్​​తవ్వకాలకు మైనింగ్​ అధికారులు అనుమతి ఇచ్చారు. దీనిపై గ్రామస్తులు తిరగబడి తవ్వకాలకు వచ్చిన మెషీన్లను అడ్డుకుని తిప్పి పంపించారు. రెండు సార్లు మైనింగ్​ లీజ్​ గడువును పొడిగించిన మైనింగ్​ అధికారులు 2018లో గ్రామస్తుల అభ్యంతరాలపై నివేదిక ఇచ్చారు.

2021 మార్చి 27న నిర్వహించిన గ్రామసభలో మైలారం గుట్టపై మైనింగ్​కు అభ్యంతరం లేదని తీర్మానం చేసినట్లు కాపీని జిల్లా మైనింగ్​ అధికారులకు సమర్పించారు. దీంతో పాటు గుట్టపై మైనింగ్​ చేయడం వల్ల అటవీ, పర్యావరణానికి, గ్రామం, చెరువుకు ఎటువంటి నష్టం జరగదని గంటల్లో నివేదిక తయారు చేసి పంపించారు. ఆ తరువాత గంటల వ్యవధిలో అనుమతులు ఇప్పించారు. గ్రామసభలో మైనింగ్​పై చర్చ జరగలేదని, తీర్మానం చేయలేదని గ్రామస్తులు ఆరోపిస్తున్నారు.

ఫోర్జరీ చేశారని పోలీసులకు ఫిర్యాదు చేసినా పట్టించుకోలేదని చెబుతున్నారు. గ్రామస్తుల ఫిర్యాదుపై విచారణ జరిపిన బల్మూరు పోలీసులు గంటల వ్యవధిలో జిల్లా కేంద్రంలోని మైనింగ్​ ఆఫీసులో, మైలారం గ్రామం, గుట్టపై ఎంక్వైరీ చేసి క్లీన్​ చిట్​ ఇచ్చారు. లైన్​ క్లియర్​ కాగానే మైనింగ్​ లీజ్​దారు భారీ మెషినరీతో గుట్టపై ఉన్న భారీ చెట్లను నరికేసి రోడ్లు ఏర్పాటు చేసుకున్నారని గ్రామస్తులు ఆరోపిస్తున్నారు.

ఎన్నికల బహిష్కరణ..

ఆరేండ్లలో ఆరు సార్లు లీజ్​దారుడిని అడ్డుకున్న గ్రామస్తులు ఇటీవల జరిగిన పార్లమెంట్​ ఎన్నికలను బహిష్కరించారు. జిల్లా అధికార యంత్రాంగం మైలారంలో 893 మంది ఓటర్లు ఉంటే 10 లోపు ఓట్లేయించి పోలింగ్​ సక్సెస్​ అయిందని చెప్పుకున్నారు. పోలీస్  పహారాలో మైనింగ్​ కొనసాగిస్తూ గుట్టపై శివాలయం, నర్సింహస్వామి దేవాలయాలు, గ్రామ దేవతల గుడులకు వెళ్లకుండా, పూజలు చేయకుండా అడ్డుకుంటున్నారని గ్రామస్తులు వాపోతున్నారు.

పౌర, మానవహక్కుల సంఘం నేతలు, పర్యావరణవేత్తలు గ్రామంలో పర్యటించి పరిస్థితులను చూడడంతో పాటు గ్రామస్తులతో మాట్లాడారు. అధికారులు తమకు సపోర్ట్​ చేయడం లేదని అంటున్న గ్రామస్తులు హైకోర్ట్, ఎన్​జీటీలో కేసులు వేయడానికి సిద్ధమవుతున్నారు.

మైనింగ్​తో అన్నీ అనర్థాలే..

నల్లమలలోని టైగర్​ రిజర్వ్​కు 2 కిలోమీటర్ల దూరంలో బల్మూరు మండలం మైలారం గ్రామం ఎకో  సెన్సిటివ్​ జోన్​లో ఉంది. గ్రామానికి, అడవికి మధ్య అడ్డంగా 50 మీటర్ల దూరంలో 115 ఎకరాల్లో విస్తరించిన పెద్ద గుట్ట ఉంది. పచ్చని చెట్లతో అడవి జంతువులు, వన్యప్రాణులు, వివిధ జాతుల పక్షులకు  నిలయమైన ఈ గుట్టకు అవతలి వైపు చెరువు ఉంది. గుట్టపై పురాతన  నర్సింహస్వామి, శివాలయం, గ్రామ దేవతల గుడులు ఉన్నాయి. కేంద్ర ప్రభుత్వ నిధులతో పల్లె ప్రకృతి వనం, క్రీడా ప్రాంగణం, డంపింగ్​ యార్డ్​ నిర్మించారు. గుట్ట కింది భాగంలో పేదలు ఇండ్లు కట్టుకున్నారు.

మైలారం, బల్మూరు, కొండనాగుల గ్రామాలకు చెందిన రైతులు, పశువుల కాపర్లు తమ జీవాలను ఇక్కడే మేపుకుంటారు. గుట్ట కింద ఉన్న చెరువు నుంచి మూడు ఊళ్లకు చెందిన 2,500 ఎకరాలకు సాగునీరు అందుతుంది. ఈ చెరువుకు రక్షణగా ఉన్న గుట్టను ఆధారంగా చేసుకుని అప్పర్​ ప్లాట్​లో 2 లక్షల ఎకరాలకు సాగు నీరందించేందుకు రూ.4,500 కోట్లతో ఉమా మహేశ్వరం లిఫ్ట్​ ప్రాజెక్ట్​ కు సంబంధించిన ప్రధాన రిజర్వాయర్​ను ఇక్కడ కట్టేందుకు డీపీఆర్​ రెడీ చేశారు. మైనింగ్​తో మైలారం ఊరి ఆనవాళ్లతో పాటు మత్స్యకారులు, రైతులు, పశువుల కాపర్లు, పురాతన దేవాలయాలు

ఉమా మహేశ్వర లిఫ్ట్​ కథ ఇక ఒడిసిపోయినట్లేనని అంటున్నారు. మైలారం గ్రామంలో జరుగుతున్న ఘటనలపై మాట్లాడేందుకు అధికారులు నిరాకరిస్తుండగా.. గ్రామస్తులు దాటేస్తున్నారు. ఒక్క ఫోర్జరీ కాగితంతో అనుమతులు తెచ్చుకుని గుట్టను, ఊరిని, తమ బతుకులను నాశనం చేస్తున్నా ఎవరూ స్పందించడం లేదన్న ఆగ్రహం, ఆక్రోశం వారి మాటల్లో కనిపిస్తోంది.